विकास काटे, ठाणे

ठाण्यामध्ये भरचौकात हत्याकांडाची भयंकर घटना घडली. कारने दोघांना चिरडण्याचा प्रयत्न करण्यात आला. या घटनेमध्ये शिवसेना शिंदे गटाच्या कार्यकर्त्याचा जागीच मृत्यू झाला. तर आणखी एक जण गंभीर जखमी झाला आहे. ही घटना ठाण्यातील वागळे इस्टेट परिसरामध्ये घडली. या घटनेमुळे खळबळ उडाली. या प्रकरणाचा तपास ठाणे पोलिस करत आहेत. या हत्याकांडाचा थरकाप उडवणारा सीसीटीव्ही व्हिडिओ समोर आला आहे.

मिळालेल्या माहितीनुसार, ठाण्यातील वागळे इस्टेट परिसरात पूर्व वैमनस्यातून ही घटना घडली. कुख्यात गुंडाने मंगळवारी रात्री दोघांना कारची धडक देत त्यांना चाकाखाली चिरडण्याचा प्रयत्न केला. या घटनेमध्ये शिंदेंच्या कार्यकर्त्याचा जागीच मृत्यू झाला. तर आणखी एक जण गंभीर जखमी झाला आहे. जखमीवर रुग्णालयात उपचार सुरू आहे. संतोष पवार असं आरोपीचे नाव असून तो सध्या फरार आहे. पोलिसांनी संतोषच्या जवळच्या व्यक्तीला ताब्यात घेतलं असून त्याची चौकशी सुरू आहे.

पोलिसांनी सांगितले की, ठाण्यातील वागळे इस्टेट परिसरातील आयटी सर्कलजवळ रोड नंबर २७ वर ही घटना घडली. या ठिकाणी आरोपी संतोष पवार उर्फ संद्याने दोघांची हत्या करण्याचा प्रयत्न केला. त्याने आपल्या कारने दोघांना धडक दिली नंतर कारच्या चाकाखाली त्यांना चिरडण्याचा प्रयत्न केला. कार पुढे मागे करत त्याने अक्षरश: एकाचा जीव घेतला.

या अपघातामध्ये शिंदेंच्या कार्यकर्त्याचा जागीच मृत्यू झाला. तर दुसरा व्यक्ती गंभीर जखमी झाला आहे. त्याच्यावर रुग्णालयामध्ये उपचार सुरू आहेत. या प्रकरणाचा पुढील तपास ठाण्यातील श्रीनगर पोलिस ठाण्यात वर्ग करण्यात आला आहे. विठ्ठल गायकर असं मृत व्यक्तीचे नाव आहे. विठ्ठल गायकर हे शिवसेना शिंदे गटाचे कार्यकर्ते होते. या प्रकरणाचा पुढील तपास पोलिस करत आहेत.