उत्तर प्रदेशमधील बागपतमध्ये मन सुन्न करून टाकणारी घटना समोर आली आहे. या ठिकाणी एका महिलेने आपल्या प्रियकराच्या मदतीने नवऱ्याला जिवंत जाळलं. या घटनेमुळे उत्तर प्रदेशमध्ये खळबळ उडाली आहे. बायकोला दुसऱ्या पुरूषासोबत फोनवर बोलताना नवऱ्याने रंगेहाथ पकडले होते. त्यावरून झालेल्या वादानंतर महिलेने आपल्या प्रियकराच्या मदतीने हे भयंकर कृत्य केले. या प्रकरणी पोलिसांनी ४ जणांविरोधात गुन्हा दाखल केला पण अद्याप कुणालाही अटक करण्यात आली नाही.

एका वर्षापूर्वीच या दोघांचे लग्न झाले होते. लग्नानंतर बायकोचे दुसऱ्या व्यक्तीबरोबर अफेअर सुरू होते. नवऱ्याने बायकोला फोनवर बोलताना पकडले होते. त्यावरून दोघांमध्ये सतत वाद होत होता. या वादातूनच बायकोन आपल्या प्रियकराच्या मदतीने नवऱ्याच्या अंगावर पेट्रोल टाकून त्याला जिवंत जाळले. शेजारी राहणाऱ्यांना या घटनेची माहिती मिळाली. त्यांनी तात्काळ पीडित तरुणाच्या कुटुंबीयांना कळवले. गंभीर जखमी झालेल्या तरुणाला त्यांनी रुग्णालयात दाखल केले. तरुणाची प्रकृती चिंताजनक होती. उपचारादरम्यान सातव्या दिवशी त्याने प्राण सोडले.

तरुणाच्या मृत्यूनंतर कुटुंबीय त्याचा मृतदेह घेऊन दोघाट पोलिस ठाण्यात पोहचले. त्याठिकाणी त्यांनी धरणे आंदोलन करत न्याय मिळावा अशी मागणी केली. या प्रकरणी पोलिसांनी ४ जणांविरोधात गुन्हा दाखल केला पण अद्याप कुणालाही अटक करण्यात आली नाही. सर्व आरोपी सध्या फरार असून पोलिस त्यांचा शोध घेत आहेत.

हत्या करण्यात आलेल्या तरुणाचे नाव सनी होते. तो बागपतच्या कंडारा गावचा रहिवासी होता. तो गावातच एक सार्वजनिक सेवा केंद्र चालवत होता. त्याचे एका वर्षापूर्वीच आरोपी महिलेसोबत लग्न झाले होते. सनीच्या वडिलांनी आरोप केला की, सनी माझा एकुलता एक मुलगा होता. त्याचे लग्न एक वर्षापूर्वी अंकिताशी झाले होते. लग्नानंतर काही महिन्यात अंकिताचे गावातील डॉक्टर अय्युबशी प्रेमसंबंध जुळले. माझ्या मुलाने अंकिताला फोनवर बोलताना अनेकदा पाहिले होते. त्याने अंकिताला डॉक्टरशी बोलू नये यासाठी अडवले होते. ही त्याची चूक होती. त्यानंतर पती-पत्नीमधील संबंध बिघडत गेले.'

२२ जुलै रोजी सनी बाईकवरून कावड यात्रेसाठी हरिद्वारला जात होता. वाटेत तो गढी कांगरान स्टेशनवर थांबला. यावेळी त्याच्या सासरच्या लोकांनी त्याला घेरले आणि मारहाण केली. त्यानंतर त्यांनी त्याला जबरदस्तीने गावात नेले आणि त्याच्यावर पेट्रोल टाकून जिवंत जाळले. तो ८० टक्के भाजला होता. सुरूवातीला त्याला बिनौली सीएचसीमध्ये नेण्यात आले. तिथून त्याला मेरठ आणि नंतर दिल्लीच्या रुग्णालयात दाखल करण्यात आले. पण तो वाचू शकला नाही. उपचारादरम्यान त्याचा मृत्यू झाला.