मध्य प्रदेशातून शिक्षकी पेशाला कलंक ठरणारी घटना घडली आहे. मध्य प्रदेशातील धार जिल्ह्यात एका अल्पवयीन मुलीचे लैंगिक शोषण करण्यात आले आहे. धक्कादायक बाब म्हणजे हे सगळं कृत्य करणारा नराधम अल्पवयीन मुलीला नृत्य शिकवणारा शिक्षक असल्याचं समोर आल आहे. एवढ्यावरच न थांबता आरोपीने सोशल मीडियावर बनावट अकाऊंट उघडून पीडितेचे फोटो व्हायरल केले आहेत. या घटनेनंतर आरोपी फरार झाला आहे.

मिळालेल्या माहितीनुसार, मध्य प्रदेशातील पिथमपूर सेक्टर-१ येथे राहणाऱ्या एका अल्पवयीन मुलीची येथील एका नृत्य शिक्षकाशी मैत्री झाली होती. या नराधम शिक्षकाचं नाव धीरज उर्फ ​​शिवा असं आहे. पीडित मुलगी तिच्या वडिलांसोबत पिथमपूरमध्ये राहत होती. पीडित मुलगी नेहमीप्रमाणे डान्स क्लासला गेली असता आरोपी नृत्य शिक्षकाने नृत्य शिकवण्याच्या बहाण्याने अल्पवयीन मुलीला बोलावून तिचे लैंगिक शोषण केले.

एवढ्यावरच न थांबता आरोपीने अल्पवयीन मुलीच्या इंस्टाग्राम आयडीवरून फोटो काढले आणि बनावट अकाउंटवरून काही फोटो व्हायरल केले. या प्रकरणी पीडित मुलीने आपल्या कुटुंबाला सांगितले असता कुटुंबीयांनी नराधम शिक्षकाविरोधात खांडवा पोलीस ठाण्यात गुन्हा दाखल केला आहे. पोलीस या नराधम शिक्षकाचा शोध घेत असून हे समजल्यावर आरोपीने गावातून पळ काढला आहे.

पोलीस या प्रकरणाचा कसून तपास करत आहेत. दरम्यान या प्रकरणी आरोपी धीरज उर्फ शिवाला काय शिक्षा होणार हे पाहणं महत्त्वाचं ठरेल. या प्रकरणानंतर पुन्हा एकदा मुलींच्या सुरक्षेचा प्रश्न ऐरणीवर आला आहे. या घटनेनंतर गावात भीतीचे वातावरण निर्माण झाले आहे.