तुम्हीसुद्धा फार्महाउस, रिसॉर्ट सारख्या ठिकाणी फिरण्यासाठी किंवा राहण्यासाठी जात असाल तर सावधान! कारण पनवेल मधून धक्कदायक प्रकार उघडकीस आला आहे. शहरातील एका फार्महाऊसच्या बाथरूममध्ये अंघोळ करण्यासाठी गेलेल्या महिलांचे व्हिडिओ शूटिंग करून अश्लील चित्रण केल्याची संतापजनक घटना घडली आहे. याप्रकरणी एका आरोपीला रंगेहात पकडून पोलिसांच्या ताब्यात दिले आहे.

मिळालेल्या माहितीनुसार, पनवेलमधील धानसर येथील रियान्स फार्म हाऊसवर २५ ऑक्टोबर रोजी काही महिला फिरण्यासाठी गेल्या होत्या. त्यादिवशी रात्री दोनच्या दरम्यान धानसर गाव येथील रियान्स फार्म हाऊस येथील मॅनेजर मनोज चौधरी यांनी बाथरूम मध्ये इलेक्ट्रॉनिक उपकरण वापरले आणि स्पाय कॅमेरा बसवून महिला बाथरूममध्ये अंघोळ करण्यासाठी व कपडे बदलण्यासाठी गेले असता त्यांचे व्हिडिओ शूटिंग केली.

महिलांची ही बाब लक्षात आली असता त्यांनी आरोपीला अद्दल शिकवण्याचे ठरवले. आरोपीचा मागोवा घेत असताना यावेळी स्पाय कॅमेरावरून अश्लील चित्रण करत असताना आरोपीला महिलांनी रंगेहाथ पकडले. घडलेल्या घटनेबाबत घाबरून न जाता महिलांनी आरोपीशी दोन हात करत पोलिसांना माहिती दिली.

तळोजा पोलिसांनी मिळालेल्या माहितीच्या आधारे आरोपी मनोज चौधरी याला अटक केली असून महिलांचे गुप्तपणे चित्रीकरण करण्या अंतर्गत त्याच्यावर गुन्हा दाखल करण्यात आला. या घटनेनंतर पोलीस अलर्ट झाले असून आरोपीने यापूर्वी देखील असा प्रकार केला आहे का याचा तपास पोलीस करत आहेत. दरम्यान तुम्हीदेखील अशाप्रकारे फार्म हाऊसवर राहायला जात असाल तर तुम्ही सुरक्षित आहात का ? याची खात्री करा.