पुण्यात एक धक्कादायक घटना घडत आहे.पुण्यात भरदिवसा रस्त्यात एका व्यावसायिकावर हत्याराने वार केले आहेत. 'गाडी नीट चालवा,' असे म्हटल्याने दोघांनी व्यावसायिकावर हत्याराने वार केले आहे.गाडी नीट चालवा असं सांगितल्याचा राग आला. त्यामुळे त्यांनी वार केला. कसबा गणपती मंदिराजवळ ही घटना घडली आहे.याप्रकरणी फरासखाना पोलिस ठाण्यात दोघांविरुद्ध गुन्हा दाखल केला आहे.

याबाबत योगेश गोपाळजी ठक्कर (वय ४५, भवानी पेठ) पोलिस ठाण्यात फिर्याद दिली आहे. पोलिसांनी दिलेल्या माहितीनुसार, दुचाकीस्वार योगेश ठक्कर रविवारी दुपारी दोन वाजण्याच्या सुमारास कसबा गणपती मंदिर परिसरातून निघाले होते. त्यावेळी फिर्यादी यांनी एका दुचाकीस्वारास 'गाडी नीट चालवा,' असे म्हटले.त्यानंतर ते मंदिराजवळ दुचाकी लावत होते. त्यावेळी दुचाकीवर आलेल्या त्या दोघांनी फिर्यादी यांना शिवीगाळ करून लाथाबुक्क्यांनी मारहाण केली. त्यानंतर फिर्यादी यांच्या हातावर आणि पाठीवर हत्याराने वार करून ते पसार झाले.

याबाबत माहिती मिळाल्यानंतर पोलिस निरीक्षक (गुन्हे) अजित जाधव घटनास्थळी दाखल झाले. पुढील तपास पोलिस उपनिरीक्षक चंद्रकांत जवळगी करीत आहेत.या घटनेमुळे आजूबाजूच्या परिसरात भीतीचे वातावरण पसरले आहे.

पुण्यात एका व्यक्तीकडून ४० लाख घेऊन केली फसवणूक

पुण्यात गेल्या अनेक दिवसांपासून गुन्हेगारीच्या घटना वाढत आहे. हडपसरमध्ये वैद्यकीय महाविद्यालयात प्रवेश देतो म्हणून एका व्यावसायिकाकडून ४० लाख रुपये घेतले आहेत. तुमच्या मुलीचे अॅडमिशन करुन देतो, असं सांगून त्या व्यावसायिकाची फसवणूक केली आहे.याबाबत हडपसर पोलिस ठाण्यात गुन्हा दाखल करण्यात आला आहे.