अक्षय बडवे, साम प्रतिनिधी

आम्हाला पैसे मागितले तर तुम्हाला धंदा करू देणार नाही, अशी व्यावसायिकांना धमकी देणाऱ्या वसुली पोलिसांवर कारवाई करण्यात आलीय. पुणे पोलिसांच्या गुन्हे शाखेतील कॉप्स २४ या शाखेतील ४ पोलीस कर्मचाऱ्यांचे निलंबन करण्यात आले आहे. या पोलील कर्मचाऱ्यांविरोधात आळंदी रोड पोलिस चौकीच्या हद्दीतील लोकांनी आणि व्यावसायिकांनी तक्रार दाखल केली होती. त्यानंतर या पोलीस कर्मचाऱ्यांवर निलंबनाची कारवाई करण्यात आलीय.

पोलीस शिपाई योगेश सुरेश माळी, पोलीस शिपाई मुकेश श्रीधर बाळले, पोलिस शिपाई शंकर दत्ता धोत्रे, पोलीस शिपाई कैलास शेषराव फुपाटे असे कर्मचाऱ्यांची नावे आहेत. मिळालेल्या माहितीनुसार, हे सर्व चार कर्मचारी पुणे पोलिसांच्या गुन्हे शाखेतील कॉप्स २४ या शाखेतील कर्मचारी आहेत. १३ नोव्हेंबर रोजी आळंदी रोड पोलिस चौकीच्या हद्दीतील लोकांनी आणि व्यावसायिकांनी विश्रांतवाडी पोलिस ठाण्यात या ४ जणांच्या विरोधात तक्रार केली होती. या पोलीस कर्मचाऱ्यांनी व्यवसायिकांना धमकी दिली होती.

"आम्ही पोलीस आहोत, आमचे कोणी काहीही करू शकत नाही. आमच्याकडे पैसे मागितले तर तुम्हाला हद्दीत धंदा करू देणार नाही" असं म्हणत त्यांनी शिवीगाळ केल्याची तक्रार देण्यात आली होती. याप्रकरणी विश्रांतवाडी पोलिस ठाण्यातून या चार जणांचा विरोधात कसुरी अहवाल वरिष्ठांना पाठवण्यात आला होता. विशेष म्हणजे याआधी सुद्धा या चार जणांच्या विरोधात वसुली केल्याचा अहवाल पोलिस आयुक्तालयात पाठवण्यात आला होता.

कर्तव्यावर असताना बेजबाबदार, बेफिकीर व जनमाणसात पोलिसांची प्रतिमा मलिन केल्याचा ठपका ठेवत गुन्हे शाखेचे पोलीस उपआयुक्त निखिल पिंगळे यांनी त्यांचे निलंबन केलं आहे.