पुण्यातून क्रूरतेचा कळस गाठणारी घटना घडली आहे. शहरातील नामांकित कंपनीतील एका महिलेची बुलढाण्यातील पेट्रोल पंपवर छेड काढण्यात आली. या प्रकरणी महिलेने पोलिसांत तक्रार दाखल केली आहे. त्यानुसार पोलिसांनी आरोपीला ताब्यात घेतले आहे. या आरोपीवर गुन्हा दाखल करण्यात आला आहे. या महिलेचं नाव सरिता (बदलेलं नाव) आहे.

मिळालेल्या माहितीनुसार, सरिता पुण्यातील एका नामांकित कंपनीत कर्मचारी आहे. ती रात्रीच्या सुमारास दिवाळीनिमित्त एका खाजगी टॅक्सीने पुण्याहून मध्य प्रदेशातील आपल्या गावाला जात होती. यादरम्यान बुलढाणा जिल्ह्यातील बीबी गावाजवळ असलेल्या एका पेट्रोल पंपावर सरिता रिफ्रेशमेंटसाठी थांबली. यावेळेस पेट्रोल पंपावरील एका कर्मचाऱ्याने कोणी नसल्याचे पाहून संधी साधून सरिताची छेड काढली.

सरिताने आरडाओरडा केला मात्र रात्रीची वेळ असल्याने आणि आजूबाजूला कोणी नसल्याने तिच्या मदतीला कोणी धावून आले नाही. त्यांनंतर सरिताने तात्काळ हेल्पलाइनवर संपर्क साधून मदत मागितली. त्यानुसार बीबी पोलीस स्टेशनचे कर्मचारी तात्काळ पेट्रोल पंपावर दाखल झाले. पोलिसांनी घडलेल्या घटनेचा आढावा घेत पेट्रोल पंपावरील छेड काढणाऱ्या आकाश इंगळे या कर्मचाऱ्याला ताब्यात घेतले.

पोलिसांनी आरोपी आकाशवर विविध कलमानुसार गुन्हा दाखल केला आहे. सदर घटनेनंतर पुन्हा एकदा समृद्धी महामार्गावरून प्रवास करणाऱ्या महिलांच्या सुरक्षेबाबत प्रश्नचिन्ह निर्माण झाल आहे. या घटनेने परिसरात भीतीचे वातावरण निर्माण झाले असून नागरिकांमध्ये संतापाची लाट उसळली आहे.