Shocking : भारतीय वंशाच्या अमेरिकन महिलेची हत्या झाल्याची धक्कादायक घटना पंजाबमध्ये घडली आहे. आरोपीने महिलेची हत्या करुन तिचा मृतदेह जाळल्याची माहिती समोर आली आहे. ही महिला सिएटलहून यूकेतील एका एनआरआय पुरुषाशी लग्न करण्यासाठी पंजाबला आली होती. जेव्हा लुधियाना पोलिसांनी महिलेच्या बेपत्ता होण्याबाबत दाखल केलेल्या एफआयआरमध्ये संशयितांची नावे दिली तेव्हा जुलैमध्ये घडलेली ही घटना उघडकीस आली.

मिळालेल्या माहितीनुसार, रुपिंदर कौर पंढेर या अमेरिकेत राहणारी एनआरआय ७१ वर्षीय महिला ७५ वर्षीय चरणजीत सिंह ग्रेवाल यांच्या निमंत्रणावर भारतात आल्या होत्या. रुपिंदर या चरणजीत सिंह यांच्याशी लग्न करण्यासाठी पंजाबला आल्या होत्या. त्याची हत्या चरणजीत सिंह ग्रेवाल यांनीच केली असल्याचा आरोप करण्यात आला आहे, असे पोलिसांनी म्हटले आहे.

२४ जुलै रोजी रुपिंदर कौर यांची बहीण कमल कौर खैराद त्यांना फोन करत होत्या. फोन सतत बंद असल्याचे दिसून आल्याने कमल कौर यांना शंका आली. २८ जुलै रोजी त्यांनी नवी दिल्लीतील अमेरिकन दूतावासाला कळवले. त्यानंतर स्थानिक पोलिसांनी रुपिंदर कौर यांचा शोध घेण्यास सुरुवात केली. मागच्या आठवड्यात रुपिंदर यांचा मृत्यू झाल्याची माहिती समोर आली.

एनआरआय रुपिंदर कौर पंढेर यांच्या हत्ये प्रकरणी पोलिसांनी मल्हा पट्टी येथील रहिवासी सुखजीत सिंह सोनू या व्यक्तीला अटक केली आहे. सोनूने रुपिंदर यांची हत्या करुन त्यांचा मृतदेह स्टोअररुममध्ये जाळल्याची कबुली दिली असे पोलिसांनी म्हटले. ही हत्या सोसूने चरणजीत सिंह ग्रेवाल यांच्या सांगण्यावरुन केल्याचेही सोनूने सांगितले. रुपिंदर यांना मारण्यासाठी ग्रेवाल यांनी सोनूला ५० लाख रुपये देण्याचे आश्वासन दिले होते.

अमेरिकन नागरिक असलेल्या रुपिंदर कौर पंढेर यांची हत्या पैशांसाठी झाल्याचा अंदाज पोलिसांनी व्यक्त केला आहे. रुपिंदर यांनी भेटीपूर्वीच ग्रेवाल यांना मोठ्या प्रमाणात पैसे दिले होते. फरार चरणजीत सिंह ग्रेवाल फरार असून त्यांचा शोध सुरु आहे. सोनूने दिलेल्या माहितीनुसार, पीडितेचे सांगाडे आणि इतर पुरावे शोधण्याचे प्रयत्न सुरु आहे, अशी माहिती उपमहानिरीक्षक सतींदर सिंह यांनी दिली आहे.