नाशिकमधील भोंदूबाबा अशोक खरात प्रकरणात एसआयटी आणि ईडीला मोठं यश आले आहे. पोलिसांना मोबाईलमधील डिलीट डेटा रिकव्हर करण्यात यश आले आहे. यामुळे मोबाईलमधून अशोक खरातचे डर्टी सिक्रेट्स समोर येण्याची शक्यता आहे. मोबाईलमधील चॅट्स, फोटो, व्हिडीओ, आणि नंबर रिकव्हर करण्यात आले आहेत. त्यामुळे एसआयटी आणि ईडीच्या हाती मोठे पुरावे लागण्याची शक्यता आहे.

खरातवर विवाहित महिलांसह युवतींना जाळ्यात अडकवल्याचा आरोप आहे. यासह आर्थिक गैरव्यवहार आणि मनी लाँड्रिंग प्रकरणीही तपास सुरू आहे. त्यामुळे मोबाईलमधून अनेक धागेदोरे समोर येण्याची शक्यता वर्तवली जात आहे. अशोक खरातविरोधात आरोप करणारे सुमारे पाच ते सहा फोन पोलीस हेल्पलाइनवर दररोज येत आहेत.

एका वरिष्ठ अधिकाऱ्याच्या म्हणण्यानुसार, २३ दिवसांत हेल्पलाइनवर शेकडो फोन आले आहेत. यातील बहुतांश तक्रारी महिलांकडून आल्या आहेत. अनेक प्रकरणांमध्ये फसवणूक, विश्वासघात आणि शोषणाचे गंभीर आरोप करणारे फोन कॉल्स होते. अशोक खरात यांच्यावर विविध कलमांखाली १५ गुन्हे दाखल झाले आहेत, त्यापैकी ८ गुन्हे महिलांशी लैंगिक संबंधित आहेत. हेल्पलाइनद्वारे मिळालेल्या तक्रारींच्या आधारे ४० जणांना साक्षीदार म्हणून त्यांची नोंद करण्यात आली आहे.

आता पोलिसांनी मोबाईलमधील डिलीट झालेल्या डेटा रिकव्हर केला आहे. यामुळे येत्या काही दिवसांत कोणते नवीन खुलासे समोर येण्याची शक्यता आहे.

खरातच्या ट्रस्ट उपाध्यक्षाचा घात?

खरातच्या शिवनिका ट्रस्टचे उपाध्यक्ष डॉ. जितेंद्र शेळकेंच्या अपघाती मृत्यूवरून घातपाताचा संशय बळावला आहे. ईडी चौकशी झालेल्या शेळकेंना पुरावे नष्ट करण्यासाठी संपवण्यात आलं का? आणि खरातच्या इतर ट्रस्टींवर कारवाई कधी होणार? असा सवाल काँग्रेस नेते नाना पटोले यांनी केला आहे. शेळकेंच्या मृत्यूवरून ठाकरे गटाच्या सुषमा अंधारे आणि अमोल मिटकरी यांनीही संशय व्यक्त केला आहे.