सागर निकवाडे, नंदूरबार

नंदूरबारमध्ये एक खळबळजनक घटना घडली आहे. नवापूर तालुक्यातील खांडबारा रस्त्यावर एका अज्ञात व्यक्तीचा मृतदेह आढळून आलाय. पोलिसांना याबाबत माहिती मिळताच त्यांनी तात्काळ घटनास्थळी धाव घेतलीये. तसेच मृतदेह ताब्यात घेतला असून पुढील तपास सुरू आह.

मिळालेल्या अधिक माहितीनुसार, रस्त्याच्या बाजूला असलेल्या नाल्यात हा मृतदेह पडला होता. मृत्यू झालेल्या व्यक्तीचं वय साधारण ३५ वर्षे असल्याचं पोलिसांनी सांगितलं आहे. हा व्यक्ती नेमका कोण आहे याबाबत अद्याप काहीच ओळख पटली नाहीये. पोलीस त्याची ओळख पटण्यासाठी तपास करत आहेत.

मृतदेहाजवळ फक्त एक मोबाईल फोन पोलिसांना सापडलाय. आता फोन कोणाचा आहे? या व्यक्तीने आत्महत्या केली की त्याचा घातपात झाला या सर्वच प्रश्नांचा पोलीस शोध घेत आहे. आज सकाळी ९ वाजता ही घटना उघडकीस आलीये. सफाई कामगार सफाईसाठी तेथे पोहचल्यावर त्यांना एक व्यक्ती नाल्यात पडल्याचा दिसला. त्यांनी आजुबाजूच्या व्यक्तींना बोलावले नीट पाहिले असता सदर व्यक्तीचा मृत्यू झाल्याचं समजलं.

डोंबिवलीत सापडला महिलेचा मृतदेह; पोलीस तपास सुरू

काल डोंबिवली पश्चिमेतील बावन्न चाळीतील रेल्वे ग्राउंड परिसरात देखील एका महिलेचा मृतदेह कुजलेल्या अवस्थेत आढळून आला. ही महिला कोण आहे? तिचा मृत्यू कसा झाला? हे अद्याप समजू शकलेले नाही. महिलेचा मृतदेह ताब्यात घेत पोलिसांनी पोस्टमार्टमसाठी रुक्मिणीबाई रुग्णालयात पाठविला आहे. अहवाल आल्यानंतरच तीच्या मृत्यूचे कारण समोर येईल.

महिलेचे वय ५० ते ५२ दरम्यान असून कुजलेल्या अवस्थेत आढळल्याने दोन दिवसांपूर्वी तिचा मृत्यू झाला असावा अशी शक्यता वर्तवण्यात येतेय. सुमसान जागा असल्याने एक व्यक्ती लघुशंकेसाठी तेथे आला आणि त्याने मृतदेह बघितला. त्यानंतर याबाबत पोलिसांना माहिती दिली. याची नोंद विष्णुनगर पोलिस ठाण्यात केली असून पुढील तपास चालू असल्याचे पोलिसांनी सांगितले आहे.