• नागपूरच्या धापेवाडा येथे संतापजनक घटना घडली

• कौटुंबिक वादातून तिघांच्या अंगावर पेट्रोल टाकण्यात आले

• दोन तरुणींसह तिघे किरकोळ जखमी झाले

• सावनेर पोलिसांनी आरोपीला काही तासांत अटक केली

नागपूरमध्ये तिघांच्या अंगावर पेट्रोल टाकून त्यांना जिवंत जाळण्याचा प्रयत्न करण्यात आल्याची धक्कादायक घटना घडली. नागपूर जिल्ह्यातील सावनेर पोलीस स्टेशन हद्दीतील धापेवाडा येथे ही संतापजनक घटना घडली. दोन तरुणींसह तिघांना पेट्रोल टाकून जाळण्याचा प्रयत्न करण्यात आला. - जुन्या कौटुंबिक वादातून नातेवाईकांवर आणि घरात कामासाठी आलेल्या दोन तरुणीना जीवे मारण्याचा प्रयत्न करण्यात आला. याप्रकरणी पोलिसांनी अवघ्या काही तासांत आरोपीला अटक केली.

मिळालेल्या माहितीनुसार, नागपूरच्या कळमेश्वर तालुक्यातील धापेवाडा येथे सोमवारी दुपारी ही घटना घडली. जुन्या कौटुंबिक वादातून नातेवाईकावर तसेच घरात कामासाठी आलेल्या दोन तरुणींवर हल्ला करण्याचा प्रयत्न करण्यात आला. त्यांच्या अंगावर पेट्रोल टाकून जिवंत जाळण्याचा प्रयत्न केला गेला. सावनेर पोलिसांनी अवघ्या काही तासांत आरोपीला अटक केली. धनराज देवनाथ चरवड यांच्या तक्रारीवरुन आरोपी राजू लक्ष्मण बरबड याच्याविरोधात गुन्हा दाखल करत त्याला अटक करण्यात आली.

धनराज चरवड यांच्या तक्रारीनुसार, २९ जून रोजी दुपारी ३ ते ३.३० वाजताच्या सुमारास त्यांचा नातेवाईक राजू लक्ष्मण बरबड (४८ वर्षे) हा सोमवारी घरी त्यांच्या घरी आला. जुन्या कारणावरून त्याने भांडण सुरू केले. या वादातून संतप्त झालेल्या राजूने धनराज बरवड तसेच घरात कामासाठी आलेल्या दोन तरुणींच्या अंगावर पेट्रोल टाकले आणि त्यांना जाळण्याचा प्रयत्न केला.

सुदैवाने या घटनेत तिघे किरकोळ जखमी झाले. त्यांच्यावर सध्या रुग्णालयात उपचार करण्यात आले. या घटनेनंतर परिसरात काही काळ तणावाचे वातावरण निर्माण झाले होते. या घटनेप्रकरण पोलिसांनी तात्काळ आरोपी राजूविरोधात गुन्हा दाखल केला. त्याला पोलिसांनी तात्काळ अटक केली. या घटनेचा पुढील तपास सावनेर पोलिस करत आहेत.