संजय गडदे, मुंबई प्रतिनिधी, साम टीव्ही मराठी

Mumbai Borivali Crime news Update : कामावरून घरी जाणाऱ्या २९ वर्षीय महिलेवर अतिप्रसंग केल्याची धक्कादायक घटना मुंबईजवळ घडली आहे. बोरीवली पश्चिम परिसरात सोमवारी संध्याकाळच्या वेळी महिला कामावरून घरी निघाली होती. त्यावेळी सुधीर फडके पुलाखाली त्या महिलेले बळजबरी नेत नराधमाने विनयभंग केला. महिलेने आरडाओरड करून आपली सुटका केली. त्या नराधमाने तिचा मोबाईल आणि सोनं लंपास केले. या प्रकरणी पोलिसांत गुन्हा दाखल करण्यात आला. पोलिसांनी घटनेचे गांभीर्य पाहून तात्काळ तपास करत काही तासांच्या आत आरोपीच्या मुसक्या आवळल्या.

बोरीवली (पश्चिम) परिसरात सोमवारी सायंकाळी एका २९ वर्षीय महिलेसोबत छेडछाड आणि लुटमारीची धक्कादायक घटना घडली. महिला कामावर जात असताना सुधीर फडके पुलाखालील निर्जनस्थळी एका युवकाने तिला ओढून नेले आणि तिच्याशी गैरवर्तन करण्याचा प्रयत्न केला. महिलेने प्रचंड ताकदीने प्रतिकार केला पण काहीच उपयोग झाला नाही.

आपले प्राण वाचवण्यासाठी घाबरलेल्या महिलेने आपले सोन्याचे दागिने आणि मोबाईल फोन आरोपीला देऊन तिथून पळ काढला आणि थेट बोरीवली पोलिस ठाण्यात धाव घेत तक्रार नोंदवली. तक्रारीनंतर झोन ११ चे उपायुक्त संदीप जाधव यांनी तातडीने विशेष पथक स्थापन केले. रात्रीभर सुरू असलेल्या शोधमोहीमेनंतर पोलिसांनी आरोपीला काही तासांतच अटक करण्यात यश मिळवले.

आरोपीची ओळख संजय राजपूत (दहिसर रहिवासी) अशी झाली असून तो हॉटेलमध्ये भांडी धुणे आणि रस्ते साफ करण्याचे काम करत असल्याचे समोर आले आहे. पोलिसांनी आरोपीकडून महिलेचे सोन्याचे दागिने, मोबाईल फोन आणि हेडफोन मिळून सुमारे ₹५२,००० किमतीची मालमत्ता जप्त केली आहे. या प्रकरणाच्या तपासाची पुढील प्रक्रिया सुरू असून, पोलिसांकडून आरोपीच्या गुन्हेगारी पार्श्वभूमीचीही चौकशी केली जात आहे.