संजय गडदे, साम टिव्ही

Cyber Crime: भारतात सध्या ऑनलाईन फसवणूकीचे प्रकार वाढले आहेत. मुंबई सारख्या शहरात देखील अनेक ऑनलाईन फसवणूकीचे प्रकार घडत असतात. यासाठी पोलिस वारंवार जागृतता पसरवण्याचे प्रयत्न करते. तरी हे स्कॅम करणारे वेगवेगळ्या पद्धतीने सामान्य लोकांना फसवतात. ताडदेव परिसरात सायबर फसवणुकीचा धक्कादायक प्रकार समोर आला असून एका न्यायमूर्तीची तब्बल ९३ हजार रुपयांची ऑनलाइन फसवणूक करण्यात आली आहे. या प्रकरणी ताडदेव पोलिसांनी अज्ञात व्यक्तीविरोधात आयटी कायद्यानुसार गुन्हा दाखल करून तपास सुरू केला आहे.

मिळालेल्या माहितीनुसार, ४६ वर्षीय तक्रारदार हे ताडदेव परिसरात राहतात आणि सध्या लघुवाद न्यायालयात न्यायमूर्ती म्हणून कार्यरत आहेत. त्यांच्या मोबाईलच्या डिस्प्लेमध्ये तांत्रिक बिघाड झाल्यामुळे त्यांनी गुगलवर कस्टमर केअरचा नंबर शोधला. त्यानंतर एका अज्ञात व्यक्तीने स्वतःला मोबाईल कंपनीच्या कस्टमर केअरमधून बोलत असल्याचे सांगून त्यांचा विश्वास संपादन केला.

त्या व्यक्तीने तक्रार नोंदवण्यासाठी कस्टमर सपोर्ट अॅप डाउनलोड करण्यास सांगत एपीके फाईल पाठवली. न्यायमूर्तींनी ती फाईल डाउनलोड करून अॅप इंस्टॉल केले. त्यानंतर तक्रार प्रक्रिया सुरू असल्याचे सांगून त्यांना १० रुपये भरण्यास सांगितले. पैसे भरताना चुकून दोन वेळा १० रुपये पाठवले गेले. मात्र काही वेळाने त्यांनी त्यांच्या गुगल पे खात्याची तपासणी केली असता त्यांच्या खात्यातून ९३ हजार रुपये डेबिट झाल्याचे आढळले. ही रक्कम सचिन यादव नावाच्या व्यक्तीच्या खात्यात ट्रान्सफर झाल्याचे समोर आले.

हा प्रकार लक्षात येताच त्यांनी तात्काळ सायबर हेल्पलाईन आणि ताडदेव पोलिसांकडे तक्रार दाखल केली. पोलिसांनी अज्ञात सायबर भामट्याविरोधात गुन्हा नोंदवून पुढील तपास सुरू केला आहे. सावधानता म्हणून गुगलवर मिळालेल्या कस्टमर केअर नंबरवर लगेच विश्वास ठेवू नये आणि अनोळखी एपीके फाईल डाउनलोड करू नये, असे आवाहन पोलिसांनी केले आहे.