Mumbai Crime News:

मुंबईतून एक धक्कादायक माहिती समोर आली आहे. एका २१ वर्षीय शिपायाने शाळेतील विद्यार्थिनींचा पाठलाग करून त्यांना त्रास दिल्याचे उघड झाले आहे. हा प्रकार उघड झाल्याने विद्यार्थिनींमध्ये भीतीचे वातावरण आहे. या प्रकरणात आरोपीला वांद्रे पोलिसांनी अटक केली आहे.

आरोपी शालेय विद्यार्थिनींना फोन करून त्यांच्याशी आक्षेपार्ह भाषेत बोलायचा. २ नोव्हेंबरपासून आरोपीने विद्यार्थिनींना फोन करण्यास सुरूवात केली होती. तसेच शाळेच्या परिसरात देखील आरोपी त्यांच्याबद्दल अश्लिल शेरेबाजी करत होता. त्याचा मुलींना प्रचंड त्रास व्हायचा. अखेर तिघींनी घडलेल्या प्रकाराची तक्रार पालकांकडे केली.

'आरोपीने पहिल्यांदा २ नोव्हेंबर रोजी शाळेत असताना मुलींवर अश्लील शेरेबाजी केली होती. या प्रकाराने मुली घाबरल्या. मात्र, नंतर त्यांनी याबाबत पालकांना माहिती देण्याचा निर्णय घेतला. पालकांनी तक्रार केली,' अशी माहिती वांद्रे पोलिसांनी दिली.

घडलेल्या प्रकाराने अल्पवयीन मुलींना मोठा मानसिक धक्का बसला आहे. मुलींच्या सुरक्षिततेची चिंता पालकांना सतावत आहे.