कल्याण अभिजित देशमुख

Kalyan Crime News:

कल्याणमध्ये चोरट्यांचा सुळसुळाट सुटला आहे. पायी चालणाऱ्या नागरिकांना बोलण्यात गुंतवून हातचलाखीने त्यांच्याजवळील दागिने लंपास करणाच्या घटना वाढतच चालल्या आहेत. अशाच एका भामट्याला कल्याण क्राईम ब्रांचने सापळा रचत बेड्या ठोकल्यात.

अफजल खान असं या सराईत चोरट्याचं नाव असून त्याच्या विरोधात महात्मा फुले, डोंबिवली,विष्णू नगर पोलीस ठाण्यात प्रत्येकी एक तर कोळसेवाडी पोलीस ठाण्यात तीन गुन्हे दाखल असल्याची माहिती पोलिसांनी दिलीये.

कल्याण डोंबिवलीत रस्त्याने पायी चालणाऱ्या नागरिकांना थांबवून बोलण्यात गुंतवून त्यांच्या जवळील सोन्या चांदीचे दागिने घेऊन पसार होण्याच्या घटना वाढल्या होत्या. या पार्श्वभूमीवर कल्याण क्राईम ब्रांच पथक या आरोपीचा शोध घेत होते. कल्याण क्राईम ब्रांच पोलीस कर्मचारी अनुप कामत व विनोद चन्ने यांना एक संशयित आरोपी चोरलेले सोन्या-चांदीचे दागिने विक्री करण्यासाठी कल्याण पश्चिम सोनार गल्ली परिसरात येणार असल्याची माहिती मिळाली.

या माहितीनुसार वरिष्ठ पोलीस निरीक्षक नरेश पवार ,पोलीस निरीक्षक राहुल मस्के, संदीप चव्हाण यांच्या पथकाने सोनार गल्ली या ठिकाणी सापळा रचला. एक इसम संशयास्पदरित्या फिरताना त्यांना त्या ठिकाणी आढळून आला. या क्राईम ब्रांच पथकाने त्याच्यावर झडप टाकत त्याला ताब्यात घेतलं. त्याच्याकडे विचारपूस केली असता त्याने उडवा उडवीची उत्तरे दिली.

पोलीसी खाक्या दाखवताच त्याने केलेल्या गुन्ह्यांची कबुली दिली. अफजल खान असं या सराईत चोरट्याचं नाव असून त्याच्याकडून पोलिसांनी पावणे तीन लाखाचे दागिने हस्तगत केलेत. अफजल कल्याण डोंबिवली परिसरात पायी चालणाऱ्या नागरिकांना हेरायचा, त्यांना थांबून त्यांचा बोलण्यात गुंतवायचा त्यानंतर हातचलाखीने त्यांच्या अंगावरील दागिने चोरी करून तेथून पसार व्हायचा.

अशा प्रकारचे त्याने अनेक गुन्हे केले असल्याचे संशय पोलिसांना आहे त्याच्या विरोधात आत्तापर्यंत सहा गुन्ह्यांची उकल करण्यात पोलिसांना यश आले असून पोलीस या प्रकरणी पुढील तपास करत आहेत.