इंदूर : संपूर्ण देशाला हादरवणारं राजा रघुवंशी हत्याकांडमध्ये आता पोलिसांच्या हाती मोठा पुरावा लागला आहे. तपास करणाऱ्या पोलिसांना मोठं यश मिळालं आहे. आज बुधवारी पलासिया परिसरातील इंडस्ट्री हाऊसच्या मागे असलेल्या नाल्यातून महत्त्वाचे पुरावे सापडले आहेत. आरोपी शिलोम जेम्सलाही टीमसह घटनास्थळी आणण्यात आलं होतं. सोनमचा तो लॅपटॉप जप्त करण्यात आल्याचं सांगण्यात येत आहे.

लॅपटॉपसह अनेक पुरावे पोलिसांच्या हाती

मिळालेल्या माहितीनुसार, शिलोमने सोनम रघुवंशीचा लॅपटॉप या नाल्यात फेकून दिला होता. जो आता जप्त करण्यात आला आहे. पोलीस सूत्रांनी दिलेल्या माहितीनुसार, राजा रघुवंशीचा मोबाईल, सोनमला दिलेली देशी बनावट पिस्तूल, काही सोन्याचे दागिने आणि एक लॅपटॉप देखील नाल्यातून सापडला आहे.

शिलोम जेम्सवर पुरावे नष्ट करण्याचा आरोप

शिलोम जेम्सवर हत्येचे पुरावे नष्ट करण्याचा आरोप आहे. लोकेंद्र तोमर आणि बलविंदर यांनी शिलोमसह त्याला पुरावे नष्ट करण्यात मदत केल्याचं समोर आलं आहे. हिराबाग येथील फ्लॅटमधून सोनमची सुटकेस, रोख रक्कम, दागिने आणि शस्त्रे गायब करण्यातही या तिघांचा हात असल्याची माहिती पोलिसांना मिळाली आहे. पोलीस अनेक दिवसांपासून इंदूरमध्ये तळ ठोकून आहे आणि हत्येशी संबंधित सर्व गोष्टींचा सखोल तपास करत आहे.

राजाच्या हत्येनंतर सोनम लॅपटॉप, दागिने आणि तिचा फोन घेऊन इंदूरला आली होती. इंदूरमध्ये राहण्यासाठी तिथे एक फ्लॅट भाड्याने घेण्यात आला होता. जेव्हा ती तो फ्लॅट सोडून गाजीपूरला गेली तेव्हा कंत्राटदार शिलोम जेम्सने तेथून ती बॅग काढून घेतली. त्यानंतर ती बॅग जाळून टाकली आणि त्यातील सामान नाल्यात फेकलं. पोलिसांनी या प्रकरणी फ्लॅट मालक लोकेंद्र तोमरलाही अटक केली आहे. सोनमच्या लॅपटॉपमधून आता पोलिसांच्या हाती आणखी महत्त्वाचे पुरावे लागण्याची शक्यता आहे.