तेलंगणातील कामारेड्डी परिसरात एक धक्कादायक घटना समोर आली आहे. यामध्ये पती पत्नीच्या किरकोळ वादातून हत्या झाल्याची घटना समोर आली आहे. या घटनेनंतर एका कुटुंबाचा संपूर्ण संसार उद्धस्त झाला आहे. पत्नीनेच पतीचा जीव घेतला असल्याचं समोर आल्याने परिसरात मोठी खळबळ माजलीये.

वाम्बे कॉलनी परिसरा ही घटना घडलीये. कोदंडा शिवाजी नामक व्यक्ती दिहाडीवर काम करणारा मजूर होता. तो आपल्या पत्नी लक्ष्मी आणि दोन लहान मुलींसोबत भाड्याच्या घरात राहत होता. त्यांच्या घराची आर्थिक परिस्थिती अत्यंत हलाखीची होती आणि रोजच्या मजुरीवरच कुटुंबाचा गाडा चालत होता. पोलिसांनी दिलेल्या माहितीनुसार, त्याच्या दोन्ही मुलींचं वय दोन वर्षे आणि एक वर्ष इतकं आहे.

शनिवारी रात्री या जोडप्याचं जेवण बनवण्याच्या मुद्द्यावरून वाद सुरू झाला. स्थानिक सूत्रांच्या माहितीनुसार, जेवणात चिकन न बनवल्याने शिवाजी नाराज झाला होता. त्यातच घरच्या आर्थिक अडचणींमुळे तो काहीसा नैराश्यात होता. या दोन्ही गोष्टींमुळे पती-पत्नीमधील वाद अधिकच चिघळला.

हा किरकोळ सुरू झालेला वाद काही क्षणांतच गंभीर झाला. आरोपानुसार, संतापाच्या भरात लक्ष्मीने घरात असलेल्या धारदार हत्याराने शिवाजीवर हल्ला केला. या हल्ल्यात त्याच्या मानेवर गंभीर जखम झाली आणि त्याचा मृत्यू झाला.

घटनेची माहिती मिळताच पोलिसांनी तात्काळ घटनास्थळी धाव घेतली. मृतदेह ताब्यात घेऊन पोस्टमॉर्टमसाठी पाठवण्यात आला आहे. आरोपी पत्नी लक्ष्मीला पोलिसांनी ताब्यात घेतलं असून तिच्याविरोधात गुन्हा दाखल करण्यात आला आहे. कामारेड्डीचे सर्कल इन्स्पेक्टर नरहरी यांनी या घटनेची पुष्टी करत सांगितलं की, प्रकरणाचा तपास सुरू आहे आणि नेमकं कारण शोधण्याचा प्रयत्न केला जात आहे.

एका रात्रीत कुटुंब झालं उद्धवस्त

या घटनेमुळे एका रात्रीत संपूर्ण कुटुंब उध्वस्त झालंय. प्राथमिक तपासात हा खून कौटुंबिक वादातून झाल्याचं समोर येत असलं तरी पोलीस सर्व बाजूंनी चौकशी करतायत.