उत्तर प्रदेशच्या हापूरमधून एक भयंकर घटना समोर आली आहे. एका व्यक्तीने आई-वडिलांची आणि बायकोची हत्या केली. विम्याचे पैसे मिळावे यासाठी त्याने हे भयंकर कृत्य केले. तिघांचा मृत्यू रस्ते अपघातामध्ये झाल्याचे खोटे कारण सांगून आरोपीने विमा कंपन्यांकडून कोट्यवधी रुपये घेतले. याप्रकरणी निवा बुपा हेल्थ इन्शुरन्स कंपनीने हापूर शहर पोलिस ठाण्यात फसवणुकीची तक्रार दाखल केली. ही संपूर्ण घटना सुनियोजित कट रचून कल्याचे सांगितले जात आहे. याप्रकरणी दोन आरोपींना पोलिसांनी अटक केली.

हापूरमध्ये राहणाऱ्या एका व्यक्तीने आपल्या मित्रांच्या मदतीने आई-वडिलांची हत्या केली. त्यानंतर त्यांचा मृत्यू रस्ते अपघातामध्ये झाला असल्याचे सांगितले. २०१७ मध्ये त्याने आईची हत्या केली आणि तिच्या नावावर एका विमा कंपनीकडून २२ लाख रुपयांचा विमा क्लेम वसूल केला. एका वर्षापूर्वी त्याने वडिलांची हत्या केली आणि विमा कंपन्यांकडून ३९ कोटी रुपयांचा क्लेम केला. एका कंपनीने त्याला दीड कोटी रुपये देखील दिले. पण निवा बूपा हेल्थ इन्श्यूरन्स कंपनीने पैसे देण्यापूर्वी तापस सुरू केला. तपासातून समोर आले की, आरोपीने वेगवेगळ्या ठिकाणी ५० पेक्षा जास्त विमा केले होते.

कंपनीने खोलात जाऊन तपास केला तर गेल्या ८ वर्षांत त्याची बायको आणि आई-वडील यांचा मृत्यू वेगवेगळ्या घटनांमध्ये झाल्याचे त्याने दाखवले. त्यानंतर संशय आणखी वाढला. कंपनीने आरोपीच्या वडिलांची पोस्टमॉर्टम रिपोर्ट आणि रुग्णालयाचा रेकॉर्ड मागवला. दोन्ही रिपोर्टमध्ये जे मृत्यूचे कारण लिहिले होते ते वेगवेगळे होते. यानंतर कंपनीने हापूर पोलिस ठाण्यात धाव घेत या प्रकरणी तक्रार दाखल केली.

पोलिसांनी रविवारी आरोपी विशाल सिंघल आणि त्याच्या मित्राला अटक केली. दोन्ही आरोपी मेरठचे राहणारे आहेत. मुख्य आरोपी विशालची कसून चौकशी सुरू आहे. त्याने आई-वडिलांची हत्या केल्याचा गुन्हा कबूल केला. आता पोलिस त्याच्या बायकोच्या मृ्त्यूचा देखील तपास करत आहेत. कारण बायकोच्या मृत्यूनंतरही आरोपीने विमा कंपनीकडून ८० लाख रुपये घेतले होते. आरोपीचे वडील मुकेश सिंघल यांनी निवा बुपा, टाटा एआयजी, मॅक्स लाईफ, टाटा एआयए, आदित्य बिर्ला आणि एचडीएफसी एर्गो यासारख्या अनेक विमा कंपन्यांच्या पॉलिसी घेतल्या होत्या ही माहिती समोर आली.

मेरठमधील गंगानगर येथील रहिवासी मुकेश सिंघल हे फोटोग्राफर होते. त्यांचा मेरठ बाजारात एक फोटो स्टुडिओ होता. त्यांची बायको प्रभा देवी गृहिणी होती. त्यांचा एकुलता एक मुलगा विशाल आहे. एफआयआरनुसार, २०२४ मध्ये आरोपीने ३९ कोटी रुपयांचा विम्यासाठी दावा दाखल केला. त्यात म्हटले होते की त्यांचे वडील मुकेश सिंघल यांचे अपघातात निधन झाले. २७ मार्च २०२४ रोजी दुपारी गढ गंगा येथून परतत असताना त्यांना एका अज्ञात वाहनाने धडक दिली. ज्यामुळे त्यांचा मृत्यू झाला.

विम्याची रक्कम वितरित करण्यापूर्वी कंपनीने चौकशी सुरू केली. आठ वर्षांच्या आत त्याची बायको, आई आणि वडील मरण पावल्याचे उघड झाले. त्याची पत्नी २०१६ मध्ये आणि त्याची आई २०१७ मध्ये मरण पावली. त्याला त्याच्या पत्नीच्या मृत्यूसाठी ८ लाख आणि आईच्या मृत्यूसाठी २२ लाख रुपये मिळाले. त्यानंतर कंपनीने सखोल चौकशी सुरू केली. आरोपीने त्याच्या दाव्यात म्हटले होते की त्याची पत्नी आणि आईचा मृत्यू रस्ते अपघातात झाला आहे.