अक्षय शिंदे पाटील, साम टीव्ही

कुटुंबात आई आणि वडिलानंतर जीव लावणारे आणि घराचा आधार कोण असेल तर आजी-आजोबा. कुटुंबातील आजीच नातवाचे लाड पुरवत असते. मात्र, जालन्यात नातवांचे लाड पुरवणाऱ्या आजीची हत्या झाल्याची खळबळजनक घटना घडली आहे. जालन्यातील एका आजीची नातवांनीच हत्या केल्याची घटना घडली आहे. जालन्याच्या भोकरदन तालुक्यातील चांदई एक्को येथे ही घटना घडली आहे. या प्रकरणी पोलिसांनी दोन आरोपींना ताब्यात घेतलं आहे.

मिळालेल्या माहितीनुसार, जालन्याच्या भोकरदन तालुक्यातील चांदई एक्को गावात नातवांनीच सोन्याच्या दागिन्यांसाठी आजीचा गळा आवळून खून केल्याची धक्कादायक घटना समोर आली आहे. केसराबाई ढाकणे असं मृत महिलेचे नाव आहे. केसराबाई या शेतामध्ये बाजावर झोपलेली असताना कानातील तीस हजार रुपयांचे दागिने ओरबडून घेऊन गळा आवळून खून केल्याची घटना घडली. दोन दिवसांपूर्वी ही घटना घडली. यासंदर्भात हसनाबाद पोलीस ठाण्यात गुन्हा दाखल करण्यात आला होता.

पोलिसांनी तपासाची चक्रे फिरवली आणि नातवांनीच सोन्याच्या दागिन्यांसाठी आजीची हत्या केल्याची धक्कादायक माहिती पोलीस तपासात समोर आली आहे. प्रदीप उर्फ काकासाहेब ढाकणे आणि संदीप ढाकणे अशी संशयित आरोपींची नावे आहेत. पोलिसांनी आरोपींना कोर्टात हजर केलं असता कोर्टाने आरोपींना दोन दिवसांची पोलीस कोठडी सुनावली आहे.

लहान भावाने केली मोठ्या भावाची हत्या

यवतमाळच्या पिंपळगावमध्ये लहान भावाने मोठ्या भावाची निर्घृण हत्या केल्याची घटना घडली. प्रमोद पेंदोरे असे मृताचे नाव आहे. हत्येची संपूर्ण घटना मोबाईल कॅमेऱ्यात चित्रित झाली आहे. लोखंडी रॉडने मारेकरी कवीश्वर हा भाऊ प्रमोदला भर रस्त्यात रॉडने मारताना दिसत आहे. यावेळी शेजारूनच अनेक नागरिक ये-जा करीत आहेत. तरी कुणीही मदतीला धावताना दिसत नाही. हत्येचा हा व्हिडिओ सोशल मीडियावर प्रचंड वायरल होतोय. या घटनेतील आरोपीला पोलिसांनी अटक केली आहे.