Jalna Crime : जुना वाद उफाळला; लोखंडी पाईपने बेदम मारहाण, चारजण जखमी

अक्षय शिंदे 

जालना : गावातील दोन परिवारांमध्ये जुना वाद आहे. हा वाद पुन्हा एकदा उफाळून आल्याने यात काही जणांनी लोखंडी पाईप व लाकडी दांड्याने बेदम मारहाण केल्याची घटना जालन्यातील जामखेड येथे घडली आहे. या मारहाणीत तीन ते चारजण जखमी झाले आहे. दरम्यान मारहाणीची घटना सीसीटीव्ही कॅमेरामध्ये कैद झाली असून या प्रकरणी पोलिसात गुन्हा दाखल करण्यात आला आहे. 

जालना जिल्ह्यातील अंबड तालुक्यातील जामखेड येथे दोन परिवारांमध्ये मागील काही दिवसांपासून वाद आहे. क्षुल्लक कारणावरून वाद उफाळून आला. यामुळे जुन्या वादाचा राग मनात धरून लोखंडी पाईपने आणि लाकडी दांड्याने मारहाण केल्याची घटना समोर आली आहे. मारहाणीमध्ये तीन ते चार जण जखमी झाले आहेत. मारहाणीची संपूर्ण घटना सीसीटीव्ही कॅमेऱ्यात कैद झाली आहे. 

पाच जणांवर गुन्हा दाखल 

दरम्यान घटना घडल्यानंतर याप्रकरणी काकासाहेब कणसे यांनी दिलेल्या फिर्यादीवरून अंबड पोलीस ठाण्यामध्ये संशयित पाच जणांविरोधात विविध कलमान्वये गुन्हा दाखल करण्यात आला आहे. या प्रकरणातील आरोपी आणि फिर्यादी एकाच गावातील असून जुन्या भांडणाच्या कारणावरून आरोपींनी शिवीगाळ करत हातातील लोखंडी पाईप आणि लाकडी दांड्याने मारहाण केल्याचं तक्रारीत म्हटलं आहे. या प्रकरणी अंबड पोलीस पुढील तपास करत आहेत.

तरुणावर कोयत्याने वार 

अहिल्यानगर जिल्ह्यातील सोनई येथे तरूणावर कोयत्याने हल्ला केल्याची घटना घडली. अक्षय थेटे या तरूणावर जिवघेणा हल्ला करण्यात आल्याने सोनई शहरातील नागरिक धास्तावले आहेत. मात्र हा हल्ला कोणत्या कारणातून करण्यात आला. याचे कारण समोर आलेले नाही. गेल्या काही महिन्यांपासून कोयता गँगची दहशत वाढली असून पोलीसांनी बंदोबस्त करावा अशी मागणी होत आहे.