संजय गडदे, साम प्रतिनिधी

एका मोबाईल चोराला जमावाकडून बेदम मारहाण करण्यात आली. या हाणामारीत चोराचा मृत्यू झालाय. इमारतीच्या बांधकाम करणाऱ्या कामगारांचा मोबाईल चोरण्याचा प्रयत्न करणाऱ्या एका तरुणाला कामगारांनी चोराला मारहाण केली. यात त्याचा जागेवरच मृत्यू झाला. हर्षल परमा (26) अशी मृताची ओळख झालीय.

या प्रकरणी पोलिसांनी ५जणांना अटक केली आहे. याबाबत मिळालेल्या अधिक माहितीनुसार, गोरेगाव पश्चिमधील मोतीलाल नगर मध्ये ही घटना घडली आहे. मारहाणीची घटना घडली तेथून हाकेच्या अंतरावर गोरेगाव पोलीस चौकी आहे. मोतीलाल नगर भाग ३ मध्ये राज पॅथर डेव्हलपरकडून एका इमारतीचे बांधकाम करणात येत आहे.

या इमारतीच्या तिसऱ्या मजल्यावर बांधकाम करणारे कामगार रात्री झोपले होते. त्यावेळी एका चोरट्याने या कामगारांचा मोबाईल चोरण्याचा प्रयत्न केला. इमारतीत प्रवेश करून चोर मोबाईल चोरत असताना कामगारांना जाग आली, त्यामुळे कामगारांनी त्याला पकडलं आणि त्याला मारहाण करण्यास सुरुवात केली. पाच कामगारांनी या चोराला मारहाण केली, यातील २ दोघांनी चोराला बांधून ठेवलं, तर दोघांनी मारलं.

तर एकाने मारहाणीचा व्हिडिओ शूट केला. चोराला मारहाण होत असताना इमारत बांधकामाचा सुपरव्हायझर होता, त्याला याची माहिती मिळाली तेव्हा त्याने गोरेगाव पोलिसांना याची माहिती दिली. ही माहिती मिळताच पोलीस घटना स्थळी दाखल झाले. त्यानंतर त्यांनी चोराला कामगाराच्या तावडीतून सोडवलं. त्यानंतर पोलिसांनी त्याला उपचारासाठी जोगेश्वरी ट्रामा केअर रुग्णालयात दाखल केलं.

मात्र त्याचा मृत्यू झाल्याचं डॉक्टरांनी घोषित केलं. यानंतर पोलिसांनी मारहाण करणाऱ्यांना अटक केली आहे. सलमान खान, इसम्मुला खान, गौतम चमार, राजीव गुप्ता आदी पाच जणांना गोरेगाव पोलिसांनी अटक केली आहे. दरम्यान या प्रकरणात अजून कोणाचा समावेश आहे का याचा तपास गोरेगाव पोलीस करत आहेत.