भंडारा जिल्ह्यातील तुमसर शहरात घरगुती वादातून धक्कादायक घटना घडल्याने संपूर्ण परिसरात खळबळ उडाली आहे. आईशी वारंवार भांडण करणाऱ्या मोठ्या भावावर धाकट्या भावाने रागाच्या भरात प्राणघातक हल्ला करून त्याचा जीव घेतल्याची धक्कादायक घटना उघडकीस आली आहे. ही हत्या एका मित्राच्या मदतीने केली गेली असून, सुरुवातीला हा मृत्यू नैसर्गिक असल्याचे भासवण्याचा प्रयत्न करण्यात आला होता. मात्र, पोलिसांनी तपासाची सखोल दिशा घेत, या मृत्यूमागील क्रूर सत्य उघडकीस आणले.

तुमसर शहरातील आंबाटोली परिसरात राहणारा ३५ वर्षीय रोशन प्रकाश वासनिक हा काही दिवसांपासून मद्यधुंद अवस्थेत सतत आईशी वाद घालत होता. या वादामुळे घरात तणावाचं वातावरण तयार झालं होतं. या पार्श्वभूमीवर रोशनचा धाकटा भाऊ राकेश प्रकाश वासनिक याने आपल्या मित्र किरण उर्फ लारा मारबते याच्यासोबत मिळून हा अत्यंत गंभीर निर्णय घेतला. दोन दिवसांपूर्वी रात्रीच्या सुमारास, राकेशने रोशनला घराबाहेर बोलावून घेतले आणि अचानक त्याच्यावर विटांनी वार केले. मद्यधुंद अवस्थेत असलेल्या रोशनने प्रतिकारही करू शकला नाही. या हल्ल्यामुळे त्याचा घटनास्थळीच मृत्यू झाला.

या घटनेनंतर आरोपी राकेश आणि किरण यांनी रोशनचा मृत्यू नैसर्गिक असल्याचा बनाव करण्याचा प्रयत्न केला. मात्र, मृतदेहावर आढळलेल्या गंभीर जखमांमुळे पोलिसांना संशय आला. शवविच्छेदन अहवालात मारहाणीचे स्पष्ट पुरावे समोर आल्यावर तपास अधिकच खोलवर करण्यात आला. पोलिसांनी शंका घेऊन राकेश आणि किरण यांना ताब्यात घेतले. चौकशीदरम्यान दोघांनी गुन्ह्याची कबुली दिली.

घरगुती वाद म्हणून दुर्लक्षित झालेली ही घटना खुनात परिवर्तित झाली असून, आरोपींनी केवळ वैयक्तिक संतापातून मोठ्या भावाचा जीव घेतल्याचं समोर आलं आहे. पोलिसांनी आरोपींविरुद्ध खुनाचा गुन्हा दाखल करत त्यांना अटक केली असून, पुढील तपास सुरू आहे. या घटनेमुळे परिसरात शोककळा पसरली असून, नात्यांतील कटुता किती टोकाला जाऊ शकते, याचं हे एक भीषण उदाहरण ठरत आहे.