धाराशिव : राज्यात दिवसेंदिवस गुन्हेगारीचं प्रमाण वाढत चाललं आहे. त्याचदरम्यान, धाराशिवमध्ये एक धक्कादायक घटना समोर आली आहे. या घटनेमुळे शहरात एकच खळबळ उडाली आहे. उधार दाढी कटिंग न केल्याने दुकानात काम करणाऱ्या तरुणावर सलून दुकानातच धारधार शस्त्राने हल्ला केला असल्याचा प्रकार समोर आला आहे. या घटनेत हल्ला झालेला तरुण जखमी झाला आहे. धाराशिव शहरातील पोस्ट ऑफिस परिसरातील न्यू क्लासिक जेंट्स पार्लर येथे ही घटना घडली आहे.

हल्लेखोराची जखमी तरुणासोबतची बाचाबाची आणि हाणामारी दुकानात असलेल्या सीसीटीव्हीत कैद झाली आहे. ऋतुराज मोरे असं हल्ल्यात जखमी झालेल्या तरुणाचं नाव असून तरुणावर जिल्हा शासकीय रुग्णालयात उपचार सुरू आहेत. आरोपीने 'दाढी आणि कटिंग उधार कर, पैसे नाहीत', असं सांगितलं. मात्र, दुकानातील तरुण कर्मचाऱ्यानं उधार सेवा नाकारल्यानं हल्ला करण्यात आल्याची माहिती समोर आली आहे.