पालघर जिल्ह्यातील वाडा शहरात एक धक्कादायक घटना घडली असून, एका २७ वर्षीय तरुणावर जीवघेणा हल्ला करण्यात आला आहे. विशेष म्हणजे या हल्ल्यामागे त्याच्याच सख्ख्या काकूचा हात असल्याचे उघड झाले असून तिने एक लाख रुपये देऊन पुतण्याच्या हत्या करण्यासाठी सुपारी दिली होती. पोलीस संबंधित तरुणाच्या काकूचा शोध घेत असून इतर आरोपींना पोलिसांनी ताब्यात घेतले आहे.

वाडा येथील आगर आळीतील पारिजात अपार्टमेंटमध्ये राहणाऱ्या ऋषिकेश मनोरे यांचे ‘पूजा भंडार’ नावाची चार दुकाने आहेत. २० जुलैच्या रात्री ऋषिकेश हे आपले दुकान बंद करून स्कूटीने घरी जात असताना जैन मंदिराजवळ तीन अनोळखी व्यक्तींनी त्यांना अडवले. “आमचा मोबाईल स्विच ऑफ झाला आहे, एक कॉल करायचा आहे,” असे सांगून त्यांनी ऋषिकेशला थांबवले. तिथेच तिघांपैकी एकाने अचानक त्यांच्या डोळ्यांत मिरची पावडर फेकली आणि उर्वरित दोघांनी धारदार शस्त्रांनी हात, डोके व पायावर वार करत जबर मारहाण केली. या हल्ल्यात ऋषिकेश गंभीर जखमी झाले आणि स्कूटीवरून खाली कोसळले. या संधीचा फायदा घेत तिघांनी त्यांचा मोबाईल व स्कूटी हिसकावून पळ काढला.

गंभीर जखमी अवस्थेत ऋषिकेश यांना तातडीने ठाण्यातील जुपिटर रुग्णालयात दाखल करण्यात आले. वाडा पोलीस ठाण्यात या प्रकरणी गुन्हा दाखल करण्यात आला असून पोलिसांनी तपासाला गती दिली. प्राथमिक तपासात सीसीटीव्ही फुटेजच्या आधारे हे आरोपी गेल्या दोन दिवसांपासून वाडा शहरात फिरत असल्याचे आढळून आले. तपासादरम्यान ही घटना फक्त लूटमारीची नसून पूर्वनियोजित असल्याचा खुलासा झाला.

पोलिसांनी मिळालेल्या माहितीच्या आधारे नाशिक येथून तीन आरोपींना ताब्यात घेतले. सुशांत सोमनाथ चिडे आणि तुषार संजय मनवर हे दोघे बांगालीबाबा एसटी स्टँड कॉलनी, नाशिक येथील रहिवासी आहेत, तर तिसरा आरोपी यश अजय कंरजे साकोरे (ता. नांदगाव) येथील आहे. या तिघांची चौकशी करताना एक मोठा गौप्यस्फोट झाला. ऋषिकेश मनोरे यांची सख्खी काकू राधिका मनिष मनोरे हिनेच कुटुंबातील वादातून पुतण्याचा काटा काढण्यासाठी एक लाख रुपयांची सुपारी या गुन्हेगारांना दिली होती. सदर काकू सध्या फरार असून, वाडा पोलिसांनी तिच्या शोधासाठी प्रयत्न सुरू केले आहेत.

या प्रकरणामुळे वाडा शहरात एकच खळबळ उडाली आहे. कुटुंबातील वाद इतका टोकाला जाऊ शकतो यावर विश्वास बसत नसून, आरोपींना कठोर शासन व्हावे, अशी मागणी स्थानिक नागरिकांकडून करण्यात येत आहे. पोलीस पुढील तपास करत असून राधिका मनोरेचा लवकरच छडा लावला जाईल, असा विश्वास पोलिसांनी व्यक्त केला आहे.