Crime News: छत्रपती संभाजीनगर जिल्ह्यातील कन्नड शहरात भरदिवसा घडलेल्या चाकू हल्ल्याच्या घटनेने परिसरात खळबळ उडाली आहे. दोन गटांमधील वादाचे रूपांतर थेट रक्तरंजित हाणामारीत झाल्याने एका २५ वर्षीय तरुणाला आपला जीव गमवावा लागला. तर, आणखी एक जण गंभीर जखमी झाला आहे. या घटनेनंतर शहरात तणावाचे वातावरण निर्माण झाले असून पोलिसांनी तपासाला वेग दिला आहे.

मिळालेल्या माहितीनुसार, कन्नड पोलीस ठाण्यासमोरील रेणुका ज्वेलर्स परिसरात दोन गटांमध्ये वाद झाला. सुरुवातीला शाब्दिक बाचाबाची झाल्यानंतर हा वाद अचानक हिंसक वळणावर गेला. दोन्ही गटांतील काही जणांनी धारदार शस्त्रांचा वापर करत एकमेकांवर हल्ला करु लागले. या हल्ल्यात नविद शेख अकरम (वय २५) तरुण गंभीर जखमी झाला.

घटनेनंतर अकरमला तातडीने उपचारासाठी रुग्णालयात नेण्याचा प्रयत्न करण्यात आला. नातेवाईकांनी वेळ वाया जाऊ नये म्हणून त्याला मोटरसायकलवरून दवाखान्यात पोहोचवण्याचा प्रयत्न केला. मात्र, उपचारापूर्वीच त्याचा मृत्यू झाल्याचे डॉक्टरांनी घोषित केले. या घटनेमुळे त्याच्या कुटुंबीयांवर दुःखाचा डोंगर कोसळला आहे.

या हाणामारीत आणखी एक व्यक्ती गंभीर जखमी झाली असून तिच्यावर रुग्णालयात उपचार सुरू आहेत. जखमीची प्रकृती चिंताजनक असल्याची माहिती समोर येत आहे. पोलिसांकडून त्याच्या जबाबाची नोंद घेण्याचे प्रयत्न सुरू आहेत. हा संपूर्ण थरार परिसरातील सीसीटीव्ही कॅमेऱ्यांमध्ये कैद झाला आहे. या फुटेजमध्ये हल्लेखोरांकडून करण्यात आलेली मारहाण आणि गोंधळ स्पष्टपणे दिसत असल्याचे सांगितले जात आहे. पोलिसांनी सीसीटीव्ही फुटेज ताब्यात घेतले असून त्याच्या आधारे तपास सुरू केला आहे.