सचिन कदम, साम टीव्ही, प्रतिनिधी

रायगड जिल्ह्याच्या माणगावमधून धक्कादायक प्रकार उघडकीस आला आहे. चोरांनी एका घरात घुसून एका महिलेला जबर मारहाण केली. या मारहामीत वृद्ध महिलेचा मृत्यू झाला आहे. घटनेची माहिती मिळताच पोलिसांनी घटनास्थळी धाव घेतली. या प्रकरणी माणगाव पोलीस ठाण्यामध्ये गुन्हा दाखल करण्यात आला आहे.

मिळालेल्या माहितीनुसार, संगीता मनोहर मोकाशी (वयवर्ष - ७०) या माणगाव तालुक्यातील येरद गावात राहत होत्या. त्यांच्या राहत्या घरात अज्ञात चोरांनी घुसखोरी केली. चोरी करताना त्यांनी संगीता मोकाशी यांना मारहाण केली. मारहाणीत त्यांचा मृत्यू झाला. त्यानंतर घरातील सामान लंपास करुन चोरांना पलायन केले.

चोरांनी संगीत यांच्या घरातून सोन्याच्या कानतल्याचे जोड, गळ्यातील मंगळसूत्र, हातात घातलेल्या बेंटेक्सच्या बांगड्या आणि दोन मोबाईल फोन चोरी केली. एकूण ३८ हजार ४०० रुपयांच्या ऐवजाची चोरी झाल्याची माहिती पोलिसांनी दिली आहे. या चोरांना पकडण्यासाठी माणगाव पोलिसांनी शोधमोहिम सुरु केली आहे.

माणगाव तालुक्यातील येरद गावात ७० वर्षांच्या वृद्ध महिलेला मारहाण केल्यानंतर चोरांनी घरातील सामान पळवून नेले. जबर मारहाणीत वृद्ध महिलेचा मृत्यू झाला. या घटनेमुळे येरद गावात हळहळ व्यक्त केली जात आहे. चोरांना शोधून त्यांना कठोर शिक्षा व्हावी अशी मागणी ग्रामस्थांकडून होत आहे.