Crime News : शिक्षक आणि विद्यार्थी यांच्या पवित्र्य नात्याला काळीमा फासणारी घटना घडली आहे. अकरावीमध्ये शिकणाऱ्या एका विद्यार्थिनीचे तिच्या शिक्षकाने वर्गाबाहेर चुंबन घेतले. या प्रकाराने घाबरुन विद्यार्थिनीने विष पिऊन आत्महत्या करण्याचा प्रयत्न केला. मृत्यूपूर्वी तिने घटलेला सर्व प्रकार तिच्या वडिलांना सांगितला.

मिळालेल्या माहितीनुसार, ही घटना भोपालच्या सुखी सेवनिया या भागात घटली आहे. १५ वर्षीय विद्यार्थिनी एका कॉन्वेन्ट शाळेत अकरावी इयत्तेमध्ये शिकत होती. २५ जानेवारी रोजी शाळा सुटल्यानंतर तिच्या शिक्षकाने तिची छेड काढली आणि जबरदस्ती करत तिचे चुंबन घेतले. या घटनेमुळे पीडित मुलगी सुन्न झाली आणि घरी पळून गेली.

शिक्षकाच्या तावडीतून सुटून ती घरी पोहोचली. घडलेल्या घटनेचा परिणाम तिच्यावर झाला होता. त्याच प्रभावात असताना तिने विष पिऊन आत्महत्या केली. थोड्या वेळात तिला उलट्या व्हायला लागल्या, तेव्हा तिला रुग्णालयात दाखल करण्यात आले. उपचार सुरु असताना तिचा मृत्यू झाला. पण मरणापूर्वी पीडितेने झालेल्या अत्याचाराबद्दल तिच्या वडिलांना सांगितले.

पोलिसांनी दिलेल्या माहितीनुसार, अल्पवयीन मुलीवर अत्याचार करणाऱ्या नराधम शिक्षकाचे नाव नीतेश कुमार असे आहे. तो इंजिनियरिंगचा विद्यार्थी आहे. तो मूळचा बिहारचा असल्याची माहिती समोर आली आहे. दरम्यान त्याच्या विरोधात गुन्हा दाखल असून स्थानिक पोलीस मागच्या आठवड्यापासून त्याचा शोध घेत आहेत.