छत्तीसगडच्या कवर्धा येथे एका २६ वर्षीय विवाहित महिलेने १६ वर्षीय मुलावर बलात्कार केल्याचा धक्कादायक प्रकार समोर आला आहे. सोशल मीडियावर ओळख वाढवत आरोपी महिलेने पीडित मुलाला हॉटेलवर बोलावून हे कृत्य केल्याचे उघड झाले आहे. याप्रकरणी महिलेवर गुन्हा दाखल करण्यात आला असून तिला अटक करण्यात आली आहे. या घटनेने मुलांच्या सुरक्षिततेवर प्रश्नचिन्ह निर्माण झाले आहे.

मिळालेल्या माहितीनुसार, सदर घटना १ मार्च रोजी उघडकीस आली. २६ वर्षीय महिलेने पीडित मुलासोबत सोशल मीडियावर ओळख निर्माण केली. त्यानंतर दोघांमधील संवाद वाढला. या संवादातून महिलेने मुलाला एका हॉटेलवर भेटण्याचा आग्रह केला. मैत्री खातर हा मुलगा तयार झाला. त्यानंतर पीडित महिलेला भेटण्यासाठी मुलगा हॉटेलवर पोचला. यादरम्यान महिलेने त्याच्यावर अमानुष अत्याचार केले. तसेच कोणाला सांगितल्यास जीवे मारण्याची धमकी देखील दिली.

महिलेच्या भीतीने पीडित मुलगा घाबरला आणि मानसिकदृष्ट्या खचला. त्याच्या वागण्या बोलण्यात फरक जाणवल्याने कुटुंबीयांनी त्याची चौकशी केली. या चौकशीत मुलाने त्याच्यासोबत झालेल्या घाणेरड्या कृत्याबद्दल सांगितले.

त्यानंतर संतप्त झालेल्या पालकांनी पोलीस ठाण्यात धाव घेत तक्रार दाखल केली. पीडित मुलाच्या पालकांच्या तक्रारीवरून महिलेला बेड्या ठोकण्यात आल्या, तसेच तिच्यावर गुन्हा दाखल करण्यात आला. या घटनेनंतर मुलांकडे पालकांचं दुर्लक्ष होत आहे का? असा प्रश्न उपस्थित केला जात आहे.