छत्रपती संभाजीनगर : छत्रपती संभाजीनगरमधील उद्योजक संतोष लड्डा यांच्या घरावरील दरोडा प्रकरणी नवीन ट्विस्ट समोर आलाय. लड्डा यांच्या घरामध्ये असलेल्या पैशाचं पोतं जादूटोणा करून गायब करण्याचा डाव बाळासाहेब इंगळे या आरोपीचा होता. त्यासाठी त्याने एक मांत्रिक आणि इतर चार जणांची टीम तयार केली होती. मात्र, महेश बोराडे या आरोपीने याची देविदास शिंदे या आरोपीला लड्डा यांच्या घरी सोनं आणि पैसे आहेत अशी माहिती दिली. देविदास शिंदे याने योगेश हसबे याला ती माहिती दिली. योगेशने टीम तयार करून थेट दरोडा टाकला, असं पोलिसांच्या तपासामध्ये समोर आलं आहे. पोलिसांच्या तपासात मांत्रिकाच्या मदतीने लड्डा यांच्या घरातील पैशाचं पोतं घेऊन जाण्याचा प्लॅन होता. मात्र, तत्पूर्वी हसबे याने टीमसोबत दरोडा टाकून सोनं लुटलं.

छत्रपती संभाजीनगरच्या वाळूज परिसरामध्ये असलेल्या उद्योजक लड्डा यांच्या घरावर १५ मे रोजी पहाटे दरोडा टाकण्यात आला होता. या दरोड्यामध्ये साडेपाच किलो सोनं लुटलं होतं. या प्रकरणी आत्तापर्यंत पोलिसांनी १७ आरोपींना अटक केलेली आहे. तर एकाचा एन्काऊंटर झाला आहे. मात्र, सोनं कुठे गेलं? हे अद्यापपर्यंत तपासात समोर आलं नाहीय. आतापर्यंत सर्व चांदी पोलिसांना मिळाली आहे. मात्र, सोनं केवळ ७४ ग्राम हस्तगत करण्यात यश आलंय. आता त्याचा शोध पोलीस घेत असल्याचं सांगितलं जात आहे. याच तपासादरम्यान जादूटोणा करून संतोष लड्डा घरा यांच्या घरी असलेल्या पैशाचं पोतं लंपास करण्यासाठी टीम तयार करण्यात आली होती ही माहिती समोर आलीय.

संतोष लड्डा याच्या घरी नेहमी ये-जा असलेला मित्र बाळासाहेब इंगळे याने एका जादूटोणा करणाऱ्या मांत्रिकाला शोधून काढलं. त्याने तीन जणांची टीम केली होती. मात्र त्यांचा डाव फसला असल्याचं तपासात समोर आलं आहे.