बुलढाण्यातून धक्कादायक बातमी समोर आली आहे. पत्नी पतीला नेहमी अपमानास्पद वागणूक देत असल्याने रागाच्या भरात पतीने पत्नीची कुऱ्हाडीने हत्या केल्याचे उघड झाले आहे. सदर घटना मध्यरात्रीच्या सुमारास जळगाव जामोद तालुक्यातील उटी बुद्रुक येथे घडली आहे. याप्रकरणी पोलिसांनी पीडितेच्या नवऱ्याला बेड्या ठोकल्या आहेत.

मिळालेल्या माहितीनुसार, मृत महिला लक्ष्मी पवन धंदाळे (२४ वर्षे ) ही तिचा पती पवन गजानन धंदाळे (२८ वर्षे ) याचा सतत अपमान करत होती. तू काम करत नाहीस, तू कुठेतरी जाऊन मर ह्या शब्दात बोलून लक्ष्मी पवनचा अपमान करत होती. वारंवार सुरु असलेल्या अपमानाला कंटाळलेल्या पवनने संतापून पत्नीची कुऱ्हाडीने हत्या केली.

या झटापटीत महिलेचा जागीच मृत्यू झाला. या प्रकरणी माहिती मिळताच पोलिसांनी तातडीने घटनास्थळी धाव घेतली. घटनस्थळाचा पंचनामा करून महिलेचा मृतदेह शवविच्छेदनासाठी पाठवण्यात आला आहे. याप्रकरणी आरोपी पवन याला पोलिसांनी अटक केली असून आरोपीने केलेल्या गुन्ह्याची कबुली दिली आहे.

दरम्यान या प्रकरणी आरोपी विरुद्ध कायमी अपराध क्रमांक 580/ 2025 कलम 103 (1) BNS प्रमाणे गुन्हा दाखल केला आहे. पोलीस या घटनेचा अधिक तपास करत असून हा तपास ठाणेदार नितीन पाटील यांच्या मार्गदर्शनाखाली पोलीस उपनिरीक्षक स्नेहा शेडगे ह्या करीत आहेत. मात्र या घटनेने परिसरात खळबळ उडाली आहे.