विनोद जिरे

Beed News :

बीडमधून एक खळबळजनक घटना समोर आली आहे. मांजरसुंबा- कपीलधार रोडच्या कडेला पोत्यात 3 दिवसाचं पुरूष जातीचं अर्भक आढळलंय. रस्त्यानं जाणाऱ्या नागरिकांना पोतं आणि त्याच्या बाजूला कुत्रे असल्याने काहीतरी गडबड असल्याचे जाणवले.

त्या व्यक्तीने कुत्र्याला बाजूला हुसकावून पाहिले. तेव्हा त्यांना पोत्यात एक लहान मुल दिसले. सदर व्यक्तीने आरडाओरडा केला आणि अन्य नागरिक तेथे जमा झाले. यावेळी नागरिकांनी तात्काळ पोलीसांना याबाबत माहिती दिली. पोलिसांना याबाबत माहिती मिळताच त्यांनीही तात्काळ घटनास्थळी धाव घेतली.

पोलिसांनी त्या चिमुकल्याला नेकनुर येथील स्त्री रुग्णालयामध्ये दाखल केले. येथे त्यावर उपचार केल्यानंतर पुढील उपचारासाठी बीडच्या जिल्हा रुग्णालयामध्ये दाखल करण्यात आलं आहे. दरम्यान सध्या या चिमुकल्याची प्रकृती चांगली असून उपचार सुरू असल्याचं डॉक्टरांनी म्हटलं आहे.

शाळेमध्ये आढळले ४ महिन्याचे नवजात अर्भक

अकोला शहरातील जिल्हा परिषदच्या उर्दू माध्यमिक शाळेत देखील ११ फेब्रुवारी रोजी अशीच एक घटना समोर आली होती. शाळेमध्ये अचानक चार नवजात अर्भक आढळून आले होते. या घटनेची माहिती मिळताच सिव्हिल लाइन पेठ पोलीस घटनास्थळी दाखल झाले. पोलिसांनी अर्भक ताब्यात घेऊन ते तपासणीसाठी अकोला शासकीय रुग्णालयात पाठवले होते.