बरेली जिल्ह्यातील सीबीगंज परिसरातून नात्याला काळिमा फासणारी धक्कादायक घटना समोर आली आहे. एका तरुणाने सख्ख्या मावशीचे अंघोळ करतानाचे व्हिडिओ काढून तिला ब्लॅकमेल करत, तिच्यावर बलात्कार केल्याची घटना घडली आहे. यानंतर महिलेचा संसार मोडल्याचे देखील उघडकीस आले आहे. या घटनेने कुटुंबात तणावाचे वातावरण निर्माण झाले होते. पोलिसांनी या प्रकरणी गुन्हा दाखल करत पुढील तपास सुरु केला आहे.

पीडित महिलेच्या तक्रारीनुसार, आरोपी हा तिचा भाचा असून तो नेहमी तिच्या घरी येत-जात असे. या ओळखीचा आणि विश्वासाचा गैरफायदा घेत त्याने सुमारे दोन वर्षांपूर्वी मावशीचे अंघोळ करतानाचे अश्लील व्हिडिओ गुपचूप तयार केला. त्यानंतर हा व्हिडिओ सोशल मीडियावर व्हायरल करण्याची धमकी देत आरोपीने तिच्यावर दबाव टाकला.

आरोपीने एकेदिवशी पीडित महिलेच्या शीतपेयात गुंगीचे औषध मिसळून तिला ते पिण्यास भाग पाडले. ती बेशुद्ध झाल्यानंतर त्याने तिच्यावर बलात्कार केल्याचा गंभीर आरोप आहे. इतकेच नव्हे, तर या घटनेदरम्यान त्याने तिचे आक्षेपार्ह फोटो आणि व्हिडिओही तयार केले आणि त्यांचा वापर करून तिला सतत ब्लॅकमेल करत राहिला. व्हिडिओ व्हायरल होईल या भीतीमुळे पीडिता बराच काळ गप्प राहिली आणि मानसिक त्रास सहन करत राहिली.

दरम्यान, पीडितेचे लग्न फरिदपूर येथे ठरले होते. १३ जून रोजी विवाह सोहळा पार पडणार होता. मात्र, आरोपीने फरिदपूर येथे जाऊन आक्षेपार्ह फोटो आणि व्हिडिओ दाखवत लग्न मोडल्याचा आरोप आहे. या घटनेमुळे पीडिता आणि तिच्या कुटुंबाला मोठा मानसिक धक्का बसला आहे. पीडितेच्या कुटुंबीयांचे म्हणणे आहे की, या प्रकारामुळे केवळ पीडितेची बदनामीच झाली नाही, तर तिचे वैवाहिक आयुष्य सुरू होण्याआधीच उद्ध्वस्त झाले आहे.

या प्रकरणी पोलिसांनी पीडितेच्या तक्रारीच्या आधारे आरोपीविरोधात गुन्हा दाखल केला असून पुढील तपास सुरू आहे. डिजिटल पुरावे गोळा करण्यात येत असून आरोपीचा शोध घेण्यासाठी विशेष पथक कार्यरत आहे. पोलिसांनी या गंभीर प्रकरणाची सखोल चौकशी केली जाईल, असे स्पष्ट केले आहे.