• अमरावतीमध्ये इंजिनिअर मुलाने केली आईची हत्या

• अमरावतीतील नवसारी रिंग रोड परिसरात घडली घटना

• गाडगेनगर पोलिसांकडून आरोपी तरुणाला अटक

• पुण्यातील आयटी कंपनीत हा तरुण इंजिनिअर म्हणून काम करतो

अमरावतीमध्ये इंजिनिअर तरुणाने आपल्या आईची हत्या केली. या घटनेमुळे अमरावती हादरले. आई सतत खोटं बोलत असल्याच्या रागातून मुलाने हे भयंकर कृत्य केले. तरुणाने गळा दाबून आईची हत्या केली त्यानंतर तो आईच्या मृतदेहाजवळच बसून राहिला. या घटनेची माहिती मिळताच पोलिसांनी घटनास्थळी धाव घेत तरुणाला ताब्यात घेतलं. त्याच्याविरोधात गुन्हा दाखल करत गाडगेनगर पोलिसांनी त्याला अटक केली.

मिळालेल्या माहितीनुसार, अमरावती शहरातील नवसारी रिंग रोड परिसरातील गजानन प्लाझा अपार्टमेंटमध्ये ही घटना घडली. ६५ वर्षीय आईची इंजिनिअर तरुणाने हत्या केली. रंजना सतीश कानफाडे असं मृत महिलेचं नाव असून तुषार सतीश कानफाडे असं आरोपी मुलाचं नाव आहे. आरोपी तुषार पुण्यातील एका आयटी कंपनीत इंजिनिअर म्हणून काम करतो. तो सध्या वर्क फ्रॉम होम म्हणून घरातूनच काम करत होता.

तुषार आणि त्याची आई दोघेच घरामध्ये राहत होते. आई खोटं बोलत असल्याच्या कारणावरून त्याने तिची गळा दाबून हत्या केली असल्याची माहिती गाडगेनगर पोलिसांनी दिली. धक्कादायक बाब म्हणजे, हत्या केल्यानंतर तुषार हा आईच्या मृतदेहाच्या बाजूलाच खुर्चीवर बसून होता. शेजारच्यांना घटनेची माहिती मिळाली तेव्हा त्यांनी पोलिसांना फोन करून बोलावून घेतलं. पोलिसांनी या प्रकरणी आरोपीला अटक केली. आईच्या हत्येमागचे आणखी काही कारण आहे का? याचा तपास पोलिस करत आहेत.