प्रयागराजमधील खासगी शाळेत नर्सरीच्या ४ वर्षाच्या विद्यार्थ्याला टीचरने चापट मारली. त्यानंतर कान आणि तोंडातून रक्त आले अन् चिमुकल्याचा भयंकर मृत्यू झाला. चार वर्षाच्या मुलाचे नाव शिवाय असे आहे. चार वर्षाच्या शिवायच्या मृत्यूने संपूर्ण प्रयागराजमध्ये खळबळ उडाली आहे. टीचरने मारलेल्या चापटीमुळे शिवायचा मृत्यू झाल्याचा आरोप त्याच्या कुटुंबीयांनी केला आहे. पोस्टमॉर्टम अहवालात मुलाच्या शरीरावर अनेक जखमांचे निशाण आढळले आहेत. याप्रकरणी पोलिसांनी दोन शिक्षकांविरुद्ध गुन्हा दाखल केला आहे. सध्या सीसीटीव्ही फुटेज तपासले जात आहे.

प्रयागराज येथील नैनी पोलीस ठाण्याच्या हद्दीतील महेवा पश्चिम पट्टी येथे राहणाऱ्या वीरेंद्र यांचा चार वर्षीय मुलगा शिवाय हा डीडीएस ज्युनिअर हायस्कूलमध्ये नर्सरीमध्ये शिकत होता. याच शाळेत त्याचा मोठा भाऊ सुमित आणि बहीण पूर्वी याही शिकतात. सुमितने सांगितले की, शिवाय रडत होता, तेव्हा टीचर त्याला सुमितच्या वर्गात घेऊन आली आणि बाकड्यावर बसवले. मात्र, शिवायने रडणे थांबवले नाही, त्यामुळे टीचरने त्याला जोरदार चापट मारली. यामुळे त्याचे डोके बाकड्यावर आपटले आणि तो खाली पडला. पडताच त्याच्या नाकातून आणि तोंडातून रक्त येऊ लागले. शिवाय सतत पाणी मागत होता, पण टीचरने त्याला पाणी दिले नाही. सुमारे दहा मिनिटांनंतर त्याची हालचाल थांबली. टीचरने त्याला हलवून पाहिले, पण त्याने कोणताही प्रतिसाद दिला नाही. यानंतर टीचरने पालकांना फोन करून बोलावले. कुटुंबीयांनी शिवायला तातडीने रुग्णालयात नेले, पण डॉक्टरांनी त्याला मृत घोषित केले.

पोस्टमॉर्टममधून धक्कादायक खुलासे

शिवायच्या मृत्यूनंतर कुटुंबीयांनी शिक्षकांवर मारहाणीचा आरोप केला. पोलिसांनी तपास सुरू केला असून मृत्यूचे कारण जाणून घेण्यासाठी पोस्टममार्टम केला. डीसीपी गंगा नगर विवेक यादव यांनी सांगितले की, पोस्टमॉर्टम अहवालात शिवायच्या शरीरावर तीन ठिकाणी जखमांचे निशाण आढळले. त्याच्या भुवया, पाय आणि खाजगी अवयवांवर जखमा होत्या. हे निशाण शाळेतील मारहाणीशी संबंधित असल्याचा संशय व्यक्त केला जात आहे. पोलिसांनी शाळेतील सीसीटीव्ही फुटेज तपासण्यास सुरुवात केली आहे.