भंडारा जिल्ह्यातील करडी पोलीस स्टेशन येथील कर्मचारी चारचाकी वाहनाने गोंदिया-रामटेक राज्य महामार्गावरील एलोरा पेपर मिल परिसरातून जात असताना त्याच्या वाहनाने एका गुराख्याला चिरडले. सदर गुरख्याचा जागीच मृत्यू झाल्याची माहिती समोर आली आहे. या घटनेची माहिती होताच परिसरातील नागरिकांनी एकच गर्दी केली. सदर अपघातग्रस्त चार चाकीची तोडफोड केली आणि सोबतच पोलीस कर्मचाऱ्यालाही मोठ्या प्रमाणात मारहाण केल्याची माहिती आहे.

दरम्यान तो पोलीस कर्मचारी देखील गंभीर जखमी झाला असून त्याला उपजिल्हा रुग्णालयात हरवण्यात आले. त्यानंतर तात्काळ पोलीस बंदोबस्त वाढवण्यात आला व परिस्थितीवर नियंत्रण मिळवण्यात आले. अजूनही पोलिस या घटनेचा तपास करत आहेत.

तसेच, तुमसर बालाघाट महामार्गावर जवळही एक मोठा भीषण अपघात घडला आहे. तुमसर बालाघाट महामार्गावर खैरलांजी जवळ भरघाव वेगाने बालाघाट दिशेने जात असलेला ट्रक चालकाचा नियंत्रण सुटल्याने ट्रक पुला खाली पडल्याची घटना सकाळी सात वाजताच्या दरम्यान घडली.

या घटनेत वाहकाचा जागीच मृत्यू झाला तर चालक गंभीर जखमी झाला आहे. या घटनेची माहिती मिळताच गावकऱ्यांनी चालकाला रुग्णालयात दाखल केले असून त्यांच्यावर उपचार सुरू आहेत. पोलिसांकडून पुढील तपास सुरु आहे.