झारखंड हादरलं! झारखंडच्या रांची जिल्ह्यात १८ वर्षीय तरुणीवर ७ जणांनी बलात्कार केल्याची संतापजनक घटना समोर आली आहे. धक्कदायक म्हणजे या घटनेत तिच्या भावाचाही हात असल्याचं समोर आलं आहे. पोलीस या घटनेचा सविस्तर तपास करत असून या घटनेने शहर हादरलं आहे.

मिळालेल्या माहितीनुसार, झारखंडमधील रांची जिल्ह्यात १८ वर्षीय तरुणीवर बलात्कार करण्यात आला आहे. पीडितेने याप्रकरणी मंगळवारी तामार पोलिस ठाण्यात या घटनेची तक्रार नोंदवली आहे. पीडितेने तक्रार नोंदवल्याप्रमाणे, तिच्या चुलत भावाने तिला मर्दान मोड येथील एका कर्यक्रमाला बोलावले. ३० सप्टेंबर रोजी ही तरुणी त्या कर्यक्रमाला गेली असता तिथे तिच्या भावाने दोन मित्रांना बोलावले.

या मित्रांपैकी एकाने पीडितेवर बलात्कार केला. तिथून पुढे या पीडितेला बुंदू येथे घेऊन गेले. बुंदूमध्ये, इतर तीन तरुणांनी तिचा विनयभंग केला. हे प्रकरण एवढ्यावरच न थांबता पीडितेला बुंदूहून रांची येथे नेण्यात आले. रांची येथे अजून एका तरुणाने तिच्यावर बलात्कार केला. नंतर त्यांनी तिला तामार परिसरातील मर्दान मोर येथे निर्जन स्थळी सोडले.

या घटनेनंतर पीडितेने काल पोलीस ठाण्यात जाऊन तक्रार दाखल केली आहे. एका पोलिस अधिकाऱ्याने सांगितले की, तामार पोलिस ठाण्यात सात जणांविरुद्ध एफआयआर दाखल करण्यात आला आहे. दरम्यान चार आरोपींची ओळख पटली आहे, तर तिघांची ओळख पटलेली नाही. आरोपींना अटक करण्यासाठी अनेक ठिकाणी छापे टाकण्यात येत आहेत. शिवाय पीडितेची आज वैद्यकीय तपासणी केली जाणार आहे.