खूप शिकायचं मोठं व्हायचं! नोकरी करायची आणि गलेलठ्ठ पगारात ऐशोआरामाच जीवन जगायचं. या वाक्याला छेद देत एका IITN जोडप्याने कॉरपोरेट कंपनीतील चांगल्या पगारातील नोकरी सोडून थेट लंडन गाठलं. आश्चर्यकारक म्हणजे हे कपलं सध्या तिथे राहून पाणी पुरी विकत आहे. त्यांची जेवणाची एक प्लेट तब्बल ६००० रुपयांना विकली जाते. अंकिता खांटे आणि अमन कृष्णा अशी या दोघांची नावं आहेत.

अंकिता खांटे या नागपूरमध्ये लहानाच्या मोठ्या झाल्या. त्यांनी व्हीएनआयटी नागपूरमधून आर्किटेक्चरमध्ये शिक्षण घेतले. नंतर आयआयटी गुवाहाटीमधून डिझाइनमध्ये पदवी घेतली. २०२४ मध्ये लग्नानंतर त्या युकेमध्ये स्थायिक झाल्या. त्यांचे पती अमन हे मूळचे उत्तर प्रदेशातील ओब्रा येथील असून त्यांनी आयआयटी धनबाद आणि आयआयआयटी हैदराबादमधून कॉम्प्युटर सायन्सचं शिक्षण घेतलं.

दोघांनाही कोणत्याही हॉटेल व्यवसायाचा अनुभव नसतानाही, या जोडप्यानं भारतीय आदरातिथ्याच्या संस्कृतीच्या जोरावर काहीतरी खास करण्याचं ठरवलं. लंडनला गेल्यानंतर अंकिता यांनी काही काळ नोकरीतून रजा घेतली. त्यापूर्वी त्यांनी बंगळुरूमधील सॅमसंग रिसर्चमध्ये प्रॉडक्ट डिझायनर म्हणून तीन वर्ष काम केलं. जवळच्या नातेवाईकांना आणि मित्रांना घरी बोलावून जेवू घालण्याची त्यांची आवड एका मोठ्या व्यवसायात बदलली. यातूनच 'The Bouzi Club' चा जन्म झाला. हा एक मासिक, तिकीट असलेला सपर क्लब (खानावळीप्रमाणे) असून तो हे दोघे आपल्या घरीच आयोजित करतात.

या क्लबमध्ये दरवेळी १० ते १२ पाहुण्यांना आमंत्रित केलं जातं. त्यांना सात कोर्सचा एक खास मेन्यू दिला जातो. या मेन्यूमध्ये भारतातील प्रामुख्याने महाराष्ट्रातील काही पदार्थांचा समावेश असतो. यामध्ये 'ढोली कढी' आणि 'नागपूर स्टाईल सांभर वडी' या पदार्थांना मोठी पसंती मिळते. या क्लबमध्ये एका वेळेच्या जेवणाची किंमत ५० पाऊंड म्हणजेच सुमारे ६,००० रुपये प्रति व्यक्ती आहे. अंकिता यांनी सांगितलं की, सुरुवातीला या व्यवसायाला फारसा प्रतिसाद मिळाला नव्हता. मात्र, जसं त्यांनी पाणीपुरी देण्यास सुरुवात केली, तसं सर्व काही बदललं असल्याचं अंकिता यांनी मुलाखतीत सांगितलं.