मध्यपूर्वेतील वाढत्या तणावाचे पडसाद आता भारतातही उमटताना दिसत आहेत. या पार्श्वभूमीवर इंधन दरवाढीचा फटका पुन्हा एकदा सर्वसामान्य नागरिकांना बसला आहे. शनिवारी पेट्रोल आणि डिझेलच्या दरात वाढ जाहीर करण्यात आली असून, पेट्रोल प्रतिलिटर ८७ पैशांनी तर डिझेल प्रतिलिटर ९१ पैशांनी महागले आहे. विशेष म्हणजे, गेल्या दहा दिवसांतील ही तिसरी दरवाढ ठरली आहे, ज्यामुळे नागरिकांच्या खिशावरचा भार अधिक वाढला आहे.

यापूर्वी १५ मे रोजी पेट्रोल आणि डिझेलच्या दरात प्रत्येकी ३ रुपयांची मोठी वाढ करण्यात आली होती. त्यानंतर १९ मे रोजीही दरात वाढ झाली होती. या सलग दरवाढीमुळे फक्त दहा दिवसांमध्ये पेट्रोल-डिझेलच्या किमतीत सुमारे ५ रुपयांची वाढ झाली आहे. राजधानी दिल्लीत पेट्रोलचा दर आता ९९.५१ रुपये प्रतिलिटरवर पोहोचला असून, डिझेलचा दर ९२.४९ रुपये प्रतिलिटर झाला आहे. या वाढत्या दरांमुळे वाहतूक खर्चात वाढ होण्याची शक्यता असून, त्याचा परिणाम इतर जीवनावश्यक वस्तूंच्या किमतींवरही होऊ शकतो.

दरम्यान, इंधन तुटवड्याच्या अफवा पसरत असतानाच केंद्रीय पेट्रोलियम मंत्रालयाने मात्र स्पष्टपणे कोणताही तुटवडा नसल्याचे सांगितले आहे. देशभरात पेट्रोल आणि डिझेलचा पुरेसा साठा उपलब्ध असून पुरवठा सुरळीत सुरू असल्याचा दावा मंत्रालयाने केला आहे. नागरिकांनी घाबरून जास्त प्रमाणात इंधन खरेदी करू नये आणि अफवांवर विश्वास ठेवू नये, असे आवाहनही करण्यात आले आहे.

काही ठिकाणी पेट्रोल पंपांवर गर्दी दिसून आली असली, तरी परिस्थिती नियंत्रणात आणण्यासाठी प्रयत्न सुरू असल्याचे सांगण्यात आले आहे. दरम्यान, आंतरराष्ट्रीय घडामोडींचा थेट परिणाम देशातील अर्थव्यवस्थेवर होत आहे. इंधन दरवाढीमुळे महागाईचा भडका उडण्याची शक्यता व्यक्त केली जात असून, येत्या काळात सर्वसामान्यांच्या आर्थिक गणितावर त्याचा मोठा परिणाम होऊ शकतो.