मुख्यमंत्री माझी लाडकी बहीण योजनेतील महिला लाभार्थ्यांसाठी महत्त्वाची बातमी आहे. योजनेचे लाभ मिळण्यासाठी ई-केवायसी करणं आवश्यक आहे. केवायसीसाठी ३१ डिसेंबरची अंतिम मुदत देण्यात आली होती. मात्र अजूनही ई-केवायसी सुविधा सुरूच आहे. हाती आलेल्या माहितीनुसार, ३१ जानेवारीपर्यंत ई-केवायसी करण्याचे मुदत वाढवण्यात आल्याचं सांगण्यात येत आहे. दरम्यान जिल्हा महिला आणि बालविकास कार्यालयाला अद्याप याबद्दल अधिकृत पत्र मिळालेले नाहीये. ई-केवायसी सुविधा सुरूच असल्यानं प्रक्रियेबाबत महिला लाभार्थ्यांमध्ये संभ्रम निर्माण झालाय.

मुख्यमंत्री माझी लाडकी बहीण योजनेसाठी पात्र लाभार्थ्यांसाठी ई-केवायसी अनिवार्य करण्यात आलं. ही प्रक्रिया १८ सप्टेंबर रोजी सुरू झाली. सुरुवातीला अंतिम मुदत १८ नोव्हेंबर होती. मात्र निर्धारित वेळेत त्यांचे ई-केवायसी पूर्ण झाल्या नसल्यानं विभागाने ही अंतिम मुदत ३१ डिसेंबरपर्यंत वाढवली. ही अंतिम मुदत ३१ डिसेंबर रोजी संपली असली तरी मोठ्या संख्येने महिलांच्या ई-केवायसी प्रक्रिया अद्याप अपूर्ण असल्याचे समोर आलंय.

ग्रामीण भागात, तांत्रिक समस्या, इंटरनेट समस्या, माहितीचा अभाव आणि कागदपत्रांमधील त्रुटींमुळे अनेक लाभार्थ्यांना त्यांचे ई-केवायसी पूर्ण करता आले नाहीये. त्यामुळे पुन्हा एकदा अंतिम मुदत वाढवण्याची चर्चा आहे. त्यानुसार ई-केवायसी आता ३१ जानेवारीपर्यंत पूर्ण करता येईल असे संकेत आहेत. योजनेत पारदर्शकता राखण्यासाठी आणि केवळ पात्र लाभार्थ्यांनाच नियमित आर्थिक लाभ मिळावा यासाठी ई-केवायसीची आवश्यकता लागू करण्यात आली आहे.