महायुती सरकारची महत्त्वकांक्षी 'लाडकी बहीण योजने'चा काही बोगस लाभार्थ्यांनी लाभ घेतल्याची बाब समोर आलीय. सरकारी कर्मचारी असणाऱ्या लाडक्या बहिणींनीही योजनेचा अर्ज भरत योजनेचा पैसा लाटला. आता सरकार या,अशा बोगस लाभार्थ्यांवर कारवाई करणार आहे. ९५२६ महिला कर्मचाऱ्यांनी नियमबाह्य पद्धतीने लाडकी बहीण योजनेचा लाभ घेतला होता. आता त्यांच्याकडून वसूली केली जाणार आहे. याशिवाय त्यांच्यावर दंडात्मक कारवाई होणार आहे. (Bogus Beneficiaries Exposed In Ladki Bahin Yojana: Maharashtra Govt To Recover Funds)

सरकारी नोकरीला असूनही लाडकी बहीण योजनेचा लाभ घेणाऱ्या महिला कर्मचाऱ्यांवर कारवाई केली जाणार आहे. त्याबाबतचे आदेश सामान्य प्रशासकीय विभागाने सर्व विभागांना दिलेत. दरम्यान ९५२६ महिला कर्मचाऱ्यांनी दहा महिन्यात लाडकी बहीण योजनेतून तब्बल साडेचौदा हजार कोटी रुपये नियमबाह्य पद्धतीने घेतले.

आता महिलांविरोधात कारवाई केली जाणार आहे. सरकार या महिलांच्या खात्यात योजनेचा जितका पैसा जमा झालाय तितका पैसा त्यांच्याकडून वसूल केला जाणार आहे. त्याचबरोबर या महिलांना दंड देखील ठोठवला जाणार असल्याची शक्यता आहे. सरकारचा पैसा लाटण्यासंदर्भात त्यांच्यावर वेतनवाढ रोखण्याची कारवाई देखील केली जाण्याची शक्यता आहे.

राज्य सरकारच्या लाडकी बहीण योजनेचा गैरफायदा घेतलेल्या सरकारी महिला कर्मचाऱ्यांविरोधात कारवाई सुरू करण्यात आलीय. त्यांच्याकडून वसुली केली जाणार असल्याची माहिती महिला बालकल्याण मंत्री आदिती तटकरे यांनी दिलीय.

सरकारी सेवेत असणाऱ्या अनेक महिलांनी लाभ घेतल्याचे उघड झाल्यानंतर काहींनी स्वखुशीनं रक्कम परत केली. तर उर्वरितांकडून आता सक्तीने वसुली केली जात आहे. फक्त पात्र महिलांनाच लाभ मिळेल, अपात्रांनी लाभ घेतल्यास कडक कारवाईला सामोरं जावं लागेल. ही योजना गरजवंतांसाठी आहे, असं मंत्री आदिती तटकरे म्हणाल्या आहेत.