महाराष्ट्र सरकारने तरुणांसाठी आतापर्यंत अनेक योजना राबवल्या आहेत.अशीच एक योजना म्हणजे मुख्यमंत्री युवा कार्य प्रशिक्षण योजना. या योजनेतून तरुणांना काम करण्याची संधी मिळणार आहे. त्यांना नोकरीपूर्व प्रशिक्षण घेता येणार आहे. नुकतेच बारावी, पदवी, मास्टर्स आणि डिप्लोमाचे निकाल जाहीर झाले आहेत. त्यानंतर या विद्यार्थ्यांना ११ महिन्यासाठी काम करण्याची संधी मिळणार आहे.

मुख्यमंत्री युवा कार्य प्रशिक्षण योजनेत तरुणांना कामाचे प्रशिक्षण दिले जाणार आहे. याचसोबत विद्यार्थ्यांना विद्यावेतन दिले जाणार आहे. बारावी उत्तीर्ण विद्यार्थ्यांना दर महिन्याला ६ हजार रुपये, आयटीआय, डिप्लोमा पास विद्यार्थ्यांना आठ हजार रुपये, पदवीधर आणि मास्टर्स केलेल्या विद्यार्थ्यांना दहा हजार रुपये दिले जाणार आहे. त्यामळे शिक्षण पूर्ण झाल्यानंतर तरुणांना प्रशिक्षण आणि त्याचा मोबदलादेखील मिळणार आहे.

अनेकदा शिक्षण झाल्यानंतर लगेचच नोकरी मिळत नाही. अनुभव नसल्याने नोकरी आणि पगारदेखील जास्त मिळत नाही. त्यामुळेच ही योजना सुर केली आहे. यामध्ये आधी शासकीय, निमशासकीय, बँकेत नोकरीपूर्व प्रशिक्षणाची संधी होती. मात्र, आता खाजगी उद्योगांमध्ये ११ महिन्यांचे प्रशिक्षण घेता येणार आहे. यासाठी तुम्हाला आधी रजिस्ट्रेशन करावे लागणार आहे. त्यानंतर विद्यावेतनदेखील मिळणार आहे.

असं करा रजिस्ट्रेशन

तुम्हाला rojgar.mahaswayam.gov.in या वेबसाइटवर जाऊन रजिस्ट्रेशन करायचे आहे. त्यानंतर तुम्हाला ई मेल आयडी टाकावा लागणार आहे. स्वतः चे नाव, मोबाईल नंबर टाकल्यानंतर ओटीपी टाका. यानंतर तुम्हाला काही दिवसांनी मेसेज येईल. यानंतर जिल्हा कौशल्य विकास, रोजगार व उद्योजकता मार्गदर्शन केंद्रात जाऊनही चौकशी करता येते. यानंतर तुम्हाला नोकरीपूर्व प्रशिक्षणाची संधी उपलब्ध करुन दिली जाते.