Mumbai: दिवाळी सणाच्या आनंदात मुंबईकरांसाठी आणखी एक महत्त्वाची बातमी समोर आली आहे. मुंबई शहर आणि मुंबई उपनगर राज्य सरकारी तसेच निमशासकीय कार्यालयांना सोमवार ९ नोव्हेंबर २०२६ रोजी स्थानिक सुट्टी जाहीर करण्यात आली आहे. महाराष्ट्र शासनाच्या सामान्य प्रशासन विभागाने यासंदर्भातली अधिकृत शासन परिपत्रक ६ नोव्हेंबर २०२६ रोजी जारी केले.

दिवाळीच्या अनुषंगाने स्थानिक सुट्टी जाहीर

दिवाळी सणाच्या निमित्ताने मुंबई शहर आणि मुंबई उपनगर जिल्ह्यातल्या शासकीय कार्यालयांना स्थानिक सुट्टी देण्याची मागणी आणि परंपरा लक्षात घेऊन राज्य सरकारने हा निर्णय घेतला आहे. त्यानुसार सोमवार, ९ नोव्हेंबर रोजी संबंधित कार्यालयांना तिसरी स्थानिक सुट्टी (Local Holiday) जाहीर करण्यात आली आहे.

विशेष म्हणजे, यापूर्वी गोपाळकाला (दहीहंडी) आणि अनंत चतुर्दशी या सणांनिमित्त मुंबई आणि मुंबई उपनगर जिल्ह्यातील शासकीय कार्यालयांना स्थानिक सुट्टी जाहीर करण्यात आली होती. आता दिवाळीच्या सणानिमित्त आणखी एका सुट्टीची भर पडली आहे.

कोणत्या कार्यालयांना मिळणार सुट्टी?

राज्य सरकारच्या परिपत्रकानुसार, ही सुट्टी मुंबई शहर आणि मुंबई उपनगर जिल्ह्यातल्या राज्य सरकारी तसेच निमशासकीय कार्यालयांना लागू राहील. त्यामुळे या जिल्ह्यांमधील संबंधित कार्यालयांचे कामकाज ९ नोव्हेंबर रोजी बंद राहील.

महाराष्ट्र शासनाचे अधिकृत परिपत्रक कुठे पाहाल?

या सुट्टीसंदर्भातील अधिकृत शासन परिपत्रक महाराष्ट्र शासनाच्या www.maharashtra.gov.in या वेबसाईटवर उपलब्ध केले आहे. संबंधित नागरिक आणि कर्मचाऱ्यांनी सुट्टीबाबत अधिकृत परिपत्रक तपासा.