मुख्यमंत्री लाडकी बहीण योजना ही आता लाडकींच्या घटत्या संख्येमुळे चर्चेत आहे. निकषांची कठोर पडताळणी होत असल्यानं लाभार्थींची संख्या तब्बल ९ लाखांनी घटली आहे. लाडकींना फेब्रुवारी महिन्याचे पैसे अद्याप मिळालेले नाहीत. त्यामुळे फेबुवारी आणि मार्च अशा दोन महिन्यांचे पैसे एकत्र दिले जाणार का? असा सवाल केला जात होता.यावरच आता महिला व बालविकास विभागाच्या मंत्री आदिती तटकरे यांनी स्पष्टीकरण दिलंय. फेब्रुवारीचा १५०० रुपयांचा आठवा हफ्ता महिला दिनाच्या पूर्वसंध्येला दिला जाणार आहे.

महिला दिनाच्या पूर्वसंध्येला हफ्ता जमा होईल, असे महिला आणि बालकल्याण मंत्री आदिती तटकरे यांनी सांगितले. विरोधकांनी सुरुवातीपासूनच या योजनेवर आक्षेप घेतला होता. या योजनेमुळेच विरोधकांना नैराश्य आलं आहे, अशी टीकाही तटकरेंनी केली आहे. तर विरोधकांनीही लाडकीमुळे इतर योजना बंद पडल्याचा हल्लाबोल केलाय.

लाडकीवरुन विरोधकांचा घणाघात

लाडकीमुळे इतर योजना बंद झाल्या, असा आरोप काँग्रेस खासदार प्रणिती शिंदे यांनी केला. गेल्या दोन महिन्यांत 9 लाख लाभार्थीची संख्या कमी झाली आहे. छाननीत जानेवारी महिन्यात 5 लाख, तर फेब्रुवारीत 4 लाख महिला अपात्र ठरल्या आहेत. योजनेचे निकष लावल्यानंतर टप्याटप्प्याने 50 लाख महिला अपात्र होण्याची शक्यता वर्तवली जात आहे. त्यामुळे सरकारच्या तिजोरीवरील खर्च दरमहा 135 कोटी आणि वर्षाला 1620 कोटी रूपयांनी वाचणार आहे.

यंत्रणेच्या कडक पडताळणीमुळे लाभार्थ्यांची संख्या प्रत्येक महिन्यात घटते आहे. त्यामुळे लाडक्या बहिणींचं टेन्शन वाढलंय. त्य़ातच 1500 चा हफ्ता 2100 रुपये कधी होणार याचीही उत्सुकता लाडकीना आहे.