महायुती सरकारने लाडकी बहीण योजना आर्थिकदृष्ट्या दुर्बल असलेल्या महिलांसाठी सुरु केली. गरजू महिलांना आर्थिक सहकार्य मिळावे यासाठीची ही महत्त्वाकांक्षी योजना आहे. ज्या महिलांना योजनेसाठी अर्ज केला, अशा लाभार्थी महिलांच्या बँकेच्या खात्यामध्ये दर महिन्याला १,५०० रुपये येतात. लाडकी बहीण योजनेशी संबंधित महत्त्वाचा निर्णय घेतला जाऊ शकतो असे म्हटले जात आहे. रक्षाबंधन होण्यापूर्वीच हा निर्णय घेतला जाणार असल्याचे म्हटले जात आहे. त्यामुळे काही लाडक्या बहिणींना राखीपौर्णिमेआधी मोठा धक्का बसणार आहे.

राज्य सरकारने लाडकी बहीण योजना सुरु केली, तेव्हा त्याबाबत ठराविक निकष ठरवण्यात आले होते. यानुसार अडीच लाख रुपयांपेक्षा कमी आर्थिक उत्पन्न असलेल्या कुटुंबातील महिलांना लाडकी बहीण योजनेच्या अंतर्गत पैसे मिळणार असे ठरले. याशिवाय ६५ वर्षांपेक्षा जास्त वय असलेल्या महिलांना लाभ मिळणार नाही असेही ठरले होते.

वयाची मर्यादा असेलला निकष न जुमानता ६५ वर्षांपेक्षा जास्त वय असलेल्या महिला देखील या योजनेचा लाभ घेत आहेत. सरकारी नोकरीत असलेल्या महिलांनीही योजनेत नाव नोंदवले आहे. याशिवाय तब्बल १४ हजार पुरुष देखील लाडकी बहीण योजनेमधून महिन्याला दीड हजार रुपये मिळवत आहेत, अशी धक्कादायक माहिती समोर आली आहे.

मिळालेल्या माहितीनुसार, लाडकी बहीण योजनेचा अनधिकृतपणे लाभ घेणाऱ्यांवर लवकरच कारवाई होणार आहे. जिल्हाधिकाऱ्यांकडून पंधरा दिवसांच्या आत खात्यांची माहिती मागवण्यात आली आहे. योजनेचा अनधिकृत पद्धतीने ज्या महिला दोषी आढळतील, त्यांच्याकडून पूर्ण रक्कम वसूल केली जाणार आहे. संबंधित दोषींवर गुन्हे दाखल होण्याचीही शक्यता आहे.