रक्षाबंधन हा भाऊ-बहिणीची सण. या सणाच्या मुहूर्तावर सरकार लाडक्या बहिणींना जुलै महिन्याचा हप्ता देणार आहे. रक्षाबंधनाचा सण लक्षात घेता राज्य सरकार जुलै २०२५ महिन्याचा ₹१५०० रुपयांचा हप्ता दिनांक ९ ऑगस्ट २०२५ पूर्वी लाभार्थी बहिणींच्या खात्यावर जमा करण्याचा निर्णय घेतलाय. याबाबतची माहिती डॉ. नीलम गोऱ्हे यांनी दिलीय.

राज्य सरकारच्या “मुख्यमंत्री माझी लाडकी बहीण” या योजनेमुळे राज्यातील लाखो बहिणींना दरमहा आर्थिक आधाराचा लाभ मिळते. या योजनेअंतर्गत पात्र महिलांच्या आधार संलग्न बँक खात्यात थेट ₹१५०० मासिक मदत जमा केली जाते. मात्र जुलै महिन्याचा हप्ता खात्यात आला नसल्याने महिलांमध्ये नाराजी होती. परंतु सरकारनं आपल्या लाडक्या बहिणींना रक्षाबंधनाचे गिफ्ट देत त्यांची नाराजी दूर केलीय. यासाठी शासनाने एकूण ₹७४६ कोटींचा निधी वितरित केला आहे. योजनेच्या निधी वितरणासाठी बीम्स प्रणालीचा वापर करण्यात आलाय.

दरम्यान या योजनेमुळे महिलांच्या आर्थिक सक्षमीकरणाला चालना मिळते. याशिवाय त्यांच्या आत्मविश्वासात लक्षणीय वाढ झालीय. रक्षाबंधनला हप्ता देण्याचा निर्णय घेतल्यानंतर डॉ. नीलम गोऱ्हे यांनी सरकारचे मनःपूर्वक आभार मानलेत शिवाय निर्णयाचे स्वागत देखील केले आहे. हा निर्णय केवळ आर्थिक मदतीपुरता मर्यादित नाही, तर तो महिलांच्या सशक्तीकरणाचा एक प्रेरणादायी टप्पा आहे. तो मानवी मूल्यांशी जोडलेला आणि सामाजिक समतेची जाणीव असलेला आहे,असं त्यावेळी म्हणाल्या.

यासह त्यांनी लाडक्या बहिणींना देण्यात येणाऱ्या सुविधांविषयी माहिती दिली. आम्ही आमदार प्रविण दरेकर यांच्या अध्यक्षतेखालील मुंबै जिल्हा मध्यवर्ती सहकारी बँकेच्या सहकार्यातून खातेदार महिलांना कर्ज, व्यवसाय आणि बाजारपेठेची सुविधा उपलब्ध करून देत आहोत. महिलांचे बचत गट, स्वयंरोजगार आणि उत्पादन विक्री यांना चालना देण्याच्या दिशेने हा प्रयत्न असल्याचे त्यांनी सांगितलं.

याचबरोबर नीलम गोऱ्हे यांनी विरोधकांना शेलक्या शब्दात सुनावलं. लाडकी बहीण योजनेला एक वर्ष पूर्ण होत आहे, पण काही राजकीय टीकाकारांकडून "ही योजना बंद होणार" असा चुकीचा प्रचार केला जातोय. मात्र प्रत्यक्षात लाभार्थी महिलांचा या योजनेवर ठाम विश्वास आहे. त्यांनी मोठ्या प्रमाणावर योजनेचा लाभ घेतलाय. त्यांच्यात आत्मविश्वास आणि आर्थिक सक्षमता वाढली आहे, असेही डॉ. गोऱ्हे यांनी स्पष्ट सांगितले.