Ladki Bahin Yojana August September installment latest update : सप्टेंबर महिन्याचा दुसरा आठवडा उजाडला तरी राज्यातील लाखो महिलांच्या मनात एकच उत्सुकता आहे—‘मुख्यमंत्री माझी लाडकी बहीण योजने’चा ऑगस्ट महिन्याचा हप्ता कधी जमा होणार? जुलै महिन्याचा हप्ता रक्षाबंधन सणाच्या मुहूर्तावर महिलांच्या खात्यात जमा करण्यात आला होता. त्यानंतर आता गणेशोत्सव अवघ्या काही दिवसांवर येऊन ठेपला असताना, मानधनाची रक्कम कधी मिळणार याकडे सर्व लाभार्थी महिलांचे लक्ष लागले आहे.

गौरी-गणपतीच्या सणात मोठे गिफ्ट मिळण्याची शक्यता

सध्या संपूर्ण महाराष्ट्रात गणेशोत्सवाची आणि गौरी-गणपती सणाची धामधूम सुरू आहे. सण-उत्सवाच्या काळात घरातील खर्च वाढतात. हेच औचित्य साधून राज्य सरकारकडून लाडक्या बहिणींना मोठा आर्थिक दिलासा दिला जाऊ शकतो. सूत्रांनी दिलेल्या माहितीनुसार, १६ सप्टेंबरनंतर लाभार्थी महिलांच्या बँक खात्यात ऑगस्ट महिन्याचा १५०० रुपयांचा सन्माननिधी टप्प्याटप्प्याने जमा होण्यास सुरुवात होण्याची दाट शक्यता आहे.

मंत्रिमंडळ बैठकीत निर्णयाची शक्यता

मंगळवारी होणाऱ्या राज्य मंत्रिमंडळाच्या बैठकीत लाडकी बहीण योजनेच्या पुढील हप्त्याबाबत अंतिम निर्णय घेतला जाऊ शकतो, असा अंदाज वर्तवला जात आहे. प्रशासकीय पातळीवर १० सप्टेंबरपर्यंत यासाठी लागणारा निधी संबंधित विभागाकडे वर्ग केला जाण्याची तयारी सुरू आहे. निधी उपलब्ध झाल्यानंतर १६ सप्टेंबरपासून थेट लाभ हस्तांतरण (DBT) प्रक्रियेद्वारे पैसे महिलांच्या खात्यावर पाठवले जातील.

एकत्र ३००० रुपये मिळणार?

जर काही तांत्रिक किंवा प्रशासकीय अडचणींमुळे २० सप्टेंबरपर्यंत ऑगस्ट महिन्याचा हप्ता जमा होऊ शकला नाही, तर महिलांसाठी आणखी एक मोठा निर्णय घेतला जाऊ शकतो. अशा परिस्थितीत सप्टेंबर अखेरीस किंवा १० ऑक्टोबरच्या आत ऑगस्ट आणि सप्टेंबर या दोन्ही महिन्यांचे हप्ते एकत्र करून तब्बल ३,००० रुपये लाडक्या बहिणींच्या खात्यात वर्ग केले जाण्याची शक्यता आहे.

सरकारच्या या निर्णयामुळे सणाच्या काळात राज्यातील महिलांना मोठा आर्थिक आधार मिळणार असून, सध्या मंत्रिमंडळाच्या बैठकीत काय निर्णय होतो याकडे संपूर्ण राज्याचे लक्ष वेधले गेले आहे.