लाडकी बहीण योजनेच्या लाभार्थ्यांना केवायसी करणे अनिवार्य केले होते. केवायसी केल्याशिवाय महिलांच्या खात्यात पैसे जमा केले जाणार नाहीत.याची अंतिम मुदत आता संपली आहे. दरम्यान, राज्यातील लाखो महिलांनी केवायसी केलेले नाही. या महिलांचा लाभ बंद केला आहे.फक्त केवायसी केलेल्या आणि पात्र असणाऱ्या महिलांनाच योजनेचा लाभ मिळत आहे. दरम्यान, आता ज्या महिलांना केवायसी करण्यास अडचणी आल्या आहेत त्यांना महिला व बालविकास विभागाच्या कार्यालयात जाऊन कागदपत्र सादर करण्यास सांगितले आहे. यानंतर आता केवायसी न केलेल्या महिलांनाही कागदपत्रे सादर करायचे असल्याचे अनेक महिलांना वाटले. परंतु याबाबत आता सरकारने स्पष्टीकरण दिले आहे.

केवायसी न केलेल्या महिलांना दिलासा नाहीच

लाडकी बहीण योजनेत केवायसी न केलेल्या महिलांनाही महिला व बालविकास विभागाच्या कार्यालयात जाऊन कागदपत्र सादर करता येणार असल्याचा समज अनेक महिलांचा झाला. परंतु असे कोणतेही निर्देश दिले नसल्याचे सांगण्यात आले आहे.

सरकारने दिली माहिती (Ladki Bahin Yojana Government Big Decision)

“मुख्यमंत्री माझी लाडकी बहीण” या योजनेंतर्गत ई-केवायसी करु न शकलेल्या महिलांना जिल्ह्याच्या महिला व बाल विकास कार्यालयात कागदपत्रे सादर करण्याचे निर्देश शासनस्तरावरुन देण्यात आलेले नाहीत. याबाबतचा कोणताही निर्णय शासनाने घेतलेला नाही,असे महिला व बालविकास विभागातर्फे कळविण्यात आले आहे.सदर वस्तुस्थिती लक्षात घेता, अशा चुकीच्या बातम्यांवर विश्वास ठेवण्यात येवू नये, असे आवाहन महिला व बाल विकास विभागातर्फे करण्यात आले आहे, असं महाराष्ट्र सरकारने सांगितले.

यामुळे केवायसी न केलेल्या महिलांना दिलासा मिळालेला नाही. या महिलांचा लाभ बंद झाला आहे. त्यांना भविष्यात योजनेचा लाभ घेता येणार नाहीये. त्यामुळे महिलांना अशा कोणत्याही बातम्यांवर विश्वास न ठेवण्याचे सांगितले आहे.