Ladki Bahin Yojana, ₹1500 installment eKYC update : मुख्यमंत्री माझी लाडकी बहीण योजनेसाठी सध्या ईकेवायसीची प्रक्रिया सुरू आहे. ३० एप्रिलपर्यंत लाडक्या बहि‍णींना ईकेवायसी करता येणार आहे. ईकेवायसीनंतर राज्यातील अनेक अपात्र लाडक्या बहि‍णींचा लाभ कायमचा बंद होणार आहे. मिळालेल्या माहितीनुसार, राज्यातील ७० लाख महिलांचा १५०० रूपयांचा लाभ बंद झाला आहे. कोणत्या कारणामुळे ७० लाख महिलांचा लाडकी बहीण योजनेचा लाभ बंद झाला? पात्र असतानाही तुमचा लाभ बंद झाला का? या प्रश्नाचे उत्तर अद्याप समजले नाही. पण हे उत्तर आता मिळणार आहे. तुम्हालाही लाडकी बहीण योजनेचा लाभ मिळाला नसेल, अथवा बंद झाला असेल.. तर तुमच्या जिल्ह्याच्या महिला व बालविकास अधिकारी कार्यालयात लाभ बंद का झाला? याचं कारण समजणार आहे.

राज्यातील २ कोटींपेक्षा जास्त महिलांना लाडकी बहीण योजनेचा लाभ मिळत होता. पण ईकेवायसीनंतर यातून अनेकांची नावे वगळण्यात आली. पण पात्र असतानाही अनेक महिलांचा लाभ बंद झाल्याच्या तक्रारी समोर आल्या. पात्र असताना लाभ बंद झाला असेल तर तुम्हाला जिल्ह्यातील महिला व बालविकास अधिकारी कार्यालयात तक्रार करता येणार आहे. तुमच्या तक्रारीनंतर तपासणी करून त्या अर्जाचा पुन्हा विचार केला जाईल. दरम्यान, राज्यातील पात्र महिला लाभार्थ्यांना एप्रिल अखेरीस ३ हजार रूपये एकत्र मिळण्याची शक्यता आहे. मार्च आणि एप्रिल या दोन महिन्यांचा लाभ एकत्र मिळण्याची शक्यता आहे.

लाडकी बहीण योजनेचा लाभ घेणाऱ्या अनेक महिलांकडे चारचाकी वाहने निघाली. त्याशिवाय ६५ वर्षांवरील अनेक महिलाही लाभ घेत असल्याचे स्पष्ट झाले. तर काही महिलांचा ‘ई-केवायसी’ चुकल्यामुळे लाभ बंद झाला आहे. राज्यातील अनेक महिलांचा नोव्हेंबर, डिसेंबर, जानेवारीनंतर लाभ बंद झाला. परंतु, लाभ बंद झाल्याचे कारण त्यांनाच समजलेले नाही. महिला व बालविकास अधिकारी कार्यालयात याचं कारण समजणार आहे. लाभ बंद होण्याचे नेमके कारण, अधिकारीच सांगतील. जिल्हाधिकाऱ्यांकडील लॉगिन जिल्हा महिला व बालविकास अधिकाऱ्यांकडे आहे.

मुख्यमंत्री माझी लाडकी बहीण योजनेचा लाभ बंद का झाला, याची माहिती तथा कारण महिलांना जिल्ह्याच्या महिला व बालविकास अधिकारी कार्यालयातून मिळेल. कोणत्या निकषांत त्या महिला लाभासाठी अपात्र ठरल्या, याचे नेमके कारण तेथे समजू शकते, अशी माहिती पुण्यातील महिला विकास विभागातील आधिकारी जामसिंग गिरासे यांनी सकाळला दिली आहे.