भारतात मद्यपानाबाबातचे कायदे खूप कडक आहेत, ज्यामुळे मद्यपान करुन गाडी चालवणे किंवा कार्यालयात जाणे गुन्हा आहे. प्रवास करताना दारूची बाटली बाळगली तर गुन्हा ठरतो का असा प्रश्न पडत असतो. विशेषतः रेल्वेने प्रवास करताना हा प्रश्न पडत असतो. पण त्याबाबत काही नियम आहेत. तसेच नियम मोडल्यास कडक शिक्षा देखील होऊ शकते.

रेल्वेतून लाखो लोक प्रवास करतात. यामुळे रेल्वेने प्रवाशांच्या सोयीसाठी भारतीय रेल्वे विभागाने सुरक्षिततेसाठी कठोर नियम बनवले आहेत. यातील भारतीय रेल्वे कायदा १९८९ थेट दारूवर बंदी घालत नसला तरी हा नियम राज्य कायद्यांच्या अधीन आहे. जर एखाद्या राज्यात दारूवर बंदी आहे, त्या राज्यातून प्रवास करताना गुन्हा मानला जाऊ शकतो. तर अशा राज्यातून प्रवास करत असाल जिथे मद्यपानावर बंदी नाही तरच ट्रेनमध्ये दारू बाळगणे शक्य आहे.

देशातील काही राज्यांनी बंदी लागू केली आहे. यात गुजरात,बिहार, नागालँड आणि लक्षद्वीप या राज्यांचा समावेश होतो. जर तुमची ट्रेन या राज्यांमधून जात असेल आणि तुमच्या जवळ दारूची बाटली आढळली तर तुम्हाला कायदेशीर अडचणींना सामोरे जावे लागू शकते. संबंधित राज्याच्या उत्पादन शुल्क कायद्यांतर्गत कारवाई केली जाते.

रेल्वे नियमांनुसार ट्रेनमधून प्रवास करणारे प्रवासी मर्यादित प्रमाणात सीलबंद दारुच्या बाटल्या नेऊ शकतात. तेही वैयक्तिक वापरासाठी परवानगी दिली जाते. तुम्ही ट्रेनमध्ये फक्त २ लिटर दारुच्या बाटल्या नेता येतात. पण त्या बाटल्या सीलबंद असणे गरजेचे आहे. तुम्ही ट्रेनमध्ये रिकाम्या बाटल्या नेऊ शकत नाही, तसेच ट्रेनमध्ये किंवा प्लॅटफॉर्मवर दारू पिण्यास मनाई आहे. रेल्वे कायद्यानुसार, नियम मोडल्यास सहा महिन्यांपर्यंत तुरुंगवास, 500 ते 1000 रुपये दंड किंवा दोन्ही होऊ शकतो. दरम्यान दारूबंदी असलेल्या राज्यात दारूसह पकडल्यास, कायद्यानुसार अटक, मोठा दंड आणि तुरुंगवास देखील होऊ शकतो.