• केंद्रीय कर्मचाऱ्यांना दिवाळीपूर्वी बोनस मिळणार

• केंद्र सरकारच्या कर्मचाऱ्यांना ३० दिवसांचा बोनस मिळणार आहे

• केंद्रीय कर्मचाऱ्यांना ६,९०८ रुपये बोनस मिळणार

• २०२५-२६ या आर्थिक वर्षातील केंद्रीय कर्मचाऱ्यांसाठीच्या बोनसचे नियम जारी

केंद्रीय कर्मचाऱ्यांसाठी आनंदाची बातमी आहे. केंद्रीय कर्मचाऱ्यांची दिवाळी यंदा गोड होणार आहे. सरकार दिवाळीपूर्वी कर्मचाऱ्यांना एक मोठं गिफ्ट देणार आहे. केंद्र सरकारने २०२५-२६ या आर्थिक वर्षासाठी केंद्रीय कर्मचाऱ्यांना ३० दिवसांचा नॉन-प्रोडक्टिविटी लिंक्ड बोनस देण्यास मंजुरी दिली आहे. या कर्मचाऱ्यांना साधारण १ महिन्याचा पगार बोनस स्वरूपात मिळेल.

अर्थ मंत्रालयाने १५ ऑक्टोबर २०२६ रोजी जारी केलेल्या पत्रकानुसार, पात्र कर्मचाऱ्यांना ३० दिवसांच्या पगाराएवढा बोनस मिळेल. या बोनसची गणना करण्यासाठी कमाल मासिक पगाराची मर्यादा ७,००० रुपये निश्चित करण्यात आली आहे. म्हणजे, ज्या कर्मचाऱ्यांचे सरासरी मासिक वेतन या मर्यादेइतके किंवा त्यापेक्षा जास्त असेल तर त्यांनाच ३० दिवसांसाठी कमाल ६,९०८ रुपये बोनस मिळेल. ज्या कर्मचाऱ्यांचे सरासरी मासिक वेतन या मर्यादेपेक्षा कमी आहे त्यांना कमी बोनस रक्कम मिळेल.

अर्थ मंत्रालयाच्या अंतर्गत असलेल्या खर्च विभागाने सांगितले की, केंद्रीय कर्मचाऱ्यांना देण्यात येणाऱ्या या बोनससाठी राष्ट्रपतींनी मंजुरी दिली आहे. केंद्र सरकारच्या या निर्णयाचा फायदा गट क आणि गट ब मधील अशा अराजपत्रित कर्मचाऱ्यांना होणार आहे जे कोणत्याही उत्पादकता-आधारित बोनस योजनेअंतर्गत समाविष्ट नाहीत.

शासनाने दिलेल्या आदेशानुसार, केंद्र सरकारचे गट 'क' कर्मचाऱ्यांना या बोनसचा लाभ होणार आहे. गट ब मधील अराजपत्रित कर्मचारी जे इतर कोणत्याही उत्पादकता संलग्न बोनस योजनेअंतर्गत समाविष्ट नाहीत त्यांना देखील याचा लाभ मिळेल. पात्र केंद्रीय सशस्त्र पोलिस दल आणि सशस्त्र दलांमधील कर्मचारी यांना देखील बोनस मिळेल. केंद्र सरकारप्रमाणेच वेतन प्रणाली लागू असलेल्या केंद्रशासित प्रदेशांमधील असे पात्र कर्मचारी जे इतर कोणत्याही बोनस किंवा सानुग्रह योजनेअंतर्गत समाविष्ट नाहीत त्यांना हो बोनस दिला जाणार आहे.

या बोनसचा लाभ त्याच कर्मचाऱ्यांना मिळणार आहे ज्यांनी किमान सहा महिन्यांची सेवा केली आहे. यासाठीकर्मचारी ३१ मार्च २०२६ रोजी सेवेत असणे आवश्यक आहे. याव्यतिरिक्त, त्यांनी २०२५-२६ या आर्थिक वर्षात किमान सहा महिन्यांची सलग सेवा पूर्ण केलेली असणे गरजेचे आहे. सहा महिने ते एक वर्ष या कालावधीतील पात्र सेवेच्या आधारावर बोनस प्रमाणानुसार त्यांना दिवाळीमध्ये बोनस दिला जाणार आहे